جاوید اقبال
مینڈھر//تحصیل مینڈھر کے سرحدی علاقے بالاکوٹ میں واقع جموں و کشمیر بینک کی واحد اے ٹی ایم مشین گزشتہ دو ماہ سے خراب پڑی ہے، جس کے باعث مقامی آبادی کو سخت مالی مشکلات کا سامنا ہے۔ دھارگلون جموں و کشمیر بینک برانچ کے تحت نصب اس مشین کی خرابی نے لوگوں کو روزمرہ مالی لین دین کے لئے دربدر کر دیا ہے، جبکہ بینک حکام کی عدم توجہی اور سستی نے عوامی مشکلات کو دوچند کر دیا ہے۔مقامی ذرائع کے مطابق بالاکوٹ اور اس کے مضافاتی دیہات کے بیشتر لوگ سرکاری ملازمین، بزرگ پنشنرز اور محنت کش مزدور طبقے سے تعلق رکھتے ہیں، جو اپنے ماہانہ اخراجات کے لئے اسی اے ٹی ایم پر انحصار کرتے ہیں۔ مشین کی بندش کے باعث انہیں نقد رقم کے حصول کے لئے مینڈھر یا دوسرے دور دراز علاقوں کا رخ کرنا پڑتا ہے، جو نہ صرف وقت طلب بلکہ مہنگے سفری اخراجات کا بھی متقاضی ہے۔علاقہ مکینوں نے شکایت کی ہے کہ اس سنگین مسئلے سے کئی مرتبہ متعلقہ بینک برانچ اور ضلعی انتظامیہ کو آگاہ کیا گیا، لیکن تاحال کسی قسم کی عملی کارروائی نہیں کی گئی۔ عوامی نمائندے، پنچایتی اراکین اور مقامی سماجی کارکنوں نے بھی صورتحال پر گہری تشویش کا اظہار کرتے ہوئے فوری حل کا مطالبہ کیا ہے۔عوام نے واضح کیا ہے کہ اگر جلد از جلد اے ٹی ایم مشین کو ٹھیک کر کے بحال نہ کیا گیا تو وہ احتجاج کا راستہ اختیار کرنے پر مجبور ہوں گے۔ انہوں نے جموں و کشمیر بینک کی اعلیٰ انتظامیہ سے اپیل کی ہے کہ وہ اس معاملے کا سنجیدگی سے نوٹس لیں اور فوری طور پر بالاکوٹ کی اے ٹی ایم سروس کو بحال کریں تاکہ لوگوں کو روزمرہ مالی ضروریات کے لیے درپیش اذیتوں سے نجات مل سکے۔
