عظمیٰ نیوزسروس
سرینگر//تہاڑجیل میں نظربند ممبرپارلیمنٹ بارہمولہ انجینئررشید کی جماعت عوامی اتحاد پارٹی نے اس اہم پیش رفت کا خیرمقدم کیا ہے جس میں دیہی ترقی ، زراعت اور کسانوں کی بہبود کے مرکزی وزیر شیوراج سنگھ چوہان نے انجینئر رشید کو خط لکھا ہے اور انہیں مطلع کیا ہے کہ حکومت ہند نے وزیراعظم گرام سڑک یوجنا کے چوتھے مرحلے کے تحت بارہمولہ پارلیمانی حلقے میں36 سڑک پروجیکٹوں کو منظوری دی ہے۔ سرکاری مواصلت کے مطابق، یہ پروجیکٹ 292.33 کروڑ روپے کی تخمینہ لاگت سے 136.69 کلومیٹر سڑک کے نیٹ ورک کا احاطہ کریں گے، جس سے حلقہ بھر میں 41 بستیوں کو رابطہ سڑکیں ملیں گی۔پارٹی ترجمان اعلیٰ انعام ان نبی نے کہاکہ یہ خط اس بات کی عکاسی کرتا ہے کہ کس طرح مساوی دیہی ترقی کے لیے انجینئر رشید کا وژن شمالی کشمیر میں ترقی کی راہنمائی کرتا رہتا ہے۔غیر منصفانہ طور پر قید ہونے کے باوجود، ان کی ترقی کے نقوش نمایاں اور متاثر کن ہیں۔انہوںنے مرکزی وزیر شیوراج سنگھ چوہان کا ان اہم سڑک پراجیکٹس کو منظوری دینے کے لیے شکریہ ادا کیا اور اسے ایک ایسا قدم قرار دیا جو دیہی رابطوں کو تبدیل کرے گا، اقتصادی روابط کو مضبوط کرے گا اور شمالی کشمیر کے لوگوں کو دیرپا فائدے لائے گا۔انہوںنے جموں وکشمیر انتظامیہ پر زور دیا کہ وہ منظور شدہ کاموں کی بروقت اور شفاف عمل آوری کو یقینی بنائے تاکہ ثمرات بلا تاخیر لوگوں تک پہنچ سکیں۔
