سوپور// میر گنڈ نوپورہ بارہمولہ میں ایک تیز رفتار سومو نے پانچ سالہ کمسن بچی کو زد میں لاکر کچل ڈالا جس کی موقعے پرہی موت واقع ہوگئی ۔پولیس نے کیس رجسٹر کرکے سوموڈرائیور کی گرفتاری عمل میں لائی ہے ۔تفصیلات کے مطابق واگورہ سے کھیتان گن جارہی سومو زیر نمبر JK01M-7806نے میر گنڈ نوپورہ کے مقام پر ایک کمسن بچی فرقان سجاد دختر سجاد احمد گنائی کو زد میں لایا ۔اگرچہ اسے فوری طور اسپتال پہنچانے کی کوشش کی گئی تاہم وہ راستے میں ہی زخموں کی تاب نہ لاکر چل بسی ۔پولیس نے جائے واردات پر پہنچ کر سوموڈرائیورہلال احمد راتھر ساکن واگورہ کو گرفتار کرلیا ہے ۔ ادھرصفاپورہ سے گاندربل کی جانب آرہی تیز رفتار ٹپر زیر نمبر JKOIC_0571گنگر ہامہ کے مقام پر ڈرائیور کے قابو سے باہر ہوکر نالہ میں لڑھک گئی جس کے باعث تین افراد زخمی ہوگئے جن میں سے دو افراد کو تشویشناک حالت میں میڈیکل انسٹیچوٹ صورہ منتقل کردیا گیا۔زخمیوں کی شناخت جامد احمد ولد نظیر احمد صوفی،عاقب احمد ولد جاوید احمد ساکنان فتح پورہ ڈرائیور مشتاق احمد صوفی ولد غلام محمد ساکنہ صفاپورہ،مشتاق احمد اور عاقب احمد کو تشویشناک حالت میں صورہ میڈیکل انسٹیچوٹ منتقل کردیا گیا۔پولیس نے معاملے کی نسبت کیس درج کرکے قانونی کارروائی شروع کردی ۔دریں اثنا خطہ چناب کی سڑکوں پر حادثات کا خونین رقص جری ہے ۔ ہفتہ کی صبح قصبہ سے 20کلو میٹر دور کلگاڑی دربشالہ میں جموں کی جانب جارہی ایک نجی مسافر کار پسی کی زد میں آ گئی جس کے نتیجہ میں 2افراد لقمہ اجل جبکہ دیگر 2زخمی ہو گئے۔ تفصیلات کے مطابق ویگن آر زیر نمبر JK17- 1896کشتواڑ سے کلگاڑی پسی کے قریب پہنچی تو ایک بڑی چٹان کار پر آن گری جس کے نتیجہ میں اس میں سوار 38سالہ انجو مہاجن زوجہ بھوپندر مہاجن ساکنہ کشتواڑ اور ان کی 15سالہ بیٹی پوری مہاجن کی موقعہ پر ہی موت واقعہ ہو گئی جب کہ بھوپندر مہاجن ولد پارس مہاجن اور اس کا سات سالہ بیٹا شدید زخمی ہو گئے ۔ زخمیوں کو فوری طور پر ٹھاٹھری میں ابتدائی طبی امداد فراہم کرنے کے بعد ضلع ہسپتال منتقل کیا گیا ہے ۔دریں اثنا قصبہ میں بٹوٹ کشتواڑ روڈ کی خستہ حالی کے خلاف احتجاج کیا گیا، وہ بالخصوص درابشالہ کے مقام پر گزشتہ دو ماہ سے سڑک کو بحال کرنے کے لئے سنجیدہ اقداما ت نہ کئے جانے پر ناراضگی کا اظہار کر رہے تھے ۔ مظاہرین کا کہنا تھا کہ ریاستی حکومت اس اہم سڑک کی حالت کو بہتربنانے کیلئے سنجیدگیکا اظہار نہیں کر رہی ہے۔ ادھر وادی میں سڑک کے مختلف حادثات میں 7 افراد زخمی ہوئے ۔تفصیلات کے مطابق پازالپورہ بجبہاڑہ کے نزدیک ایک نامعلوم گاڑی ایک موٹر سائیکل کے ساتھ ٹکرائی نتیجے کے طور پر موٹر سائیکل پر سوار محمد یونس لون، گلزار احمد بٹ اور خورشید احمد لون ساکناں سمتھن بجبہاڑہ زخمی ہوئے جنہیںعلاج و معالجہ کیلئے بون اینڈ جوانٹس اسپتال سرینگر منتقل کیا گیا۔ سڑک کے ایک حادثے میں بثر و ترال کے نزدیک ایک موٹر سائیکل اور ایک ماروتی کار کے درمیان ٹکرہوئی نتیجے کے طور پر موٹر سائیکل سوار مومن اشرف ولد محمد اشرف گنائی زخمی ہوا ۔سڑک کے ایک اور حادثے میں ایف۔ سی ۔ آئی میر بازار کولگام کے نزدیک ٹاٹا منی بس زیر نمبرJK03-1071 کو حادثہ پیش آیا اس حادثے میں دو مسافر محمد شفیع بیگ ولد غلام حسن ساکن کھرون اور عبدلرشید شالہ ساکن مغل گنڈ قاضی گنڈ زخمی ہوئے جن کوعلاج ومعالجہ کیلئے اسپتال منتقل کیاگیا۔ سڑک کے ایک اور حادثے میں دیوسر کولگام کے نزدیک ایک نامعلوم موٹر سائیکل نے ایک عورت حنیفہ بیگم زوجہ محمد رمضان گنائی کو ٹکرمارکر زخمی کیا جس کوعلاج و معالجہ کیلئے ڈسڑکٹ اسپتال کولگام منتقل کرکے مزید علاج کیلئے صورہ میڈکل انسٹی چیوٹ پہنچایا گیا۔
بارہمولہ اور کشتواڑ میں 3 افراد لقمہ اجل
