سرینگر// کپوارہ میں3 فوجی ہلاکتوںکا ڈھول پیٹنے اور چھتیس گڑھ میں26فورسز اہلکاروں کی موت پر خاموشی کو کشمیری مسلمانوں کے خلاف نفرت پیدا کرنے کا منصوبہ اور نئی چال قرار دیتے ہوئے نیشنل کانفرنس کے صدر اور پارلیمنٹ ممبر ڈاکٹر فاروق عبداللہ نے واضح کیا کہ’’گولیاں چلائیں یا بم گرائیں‘‘ مسئلہ کشمیر کے حل اورہندو پاک کے درمیان تعلقات کی بہتری کیلئے مذاکراتی عمل کے بغیر اور کوئی چارہ نہیں ہے۔نیشنل کانفرنس کے قانون سازیہ ممبران اور پارٹی لیڈروں سے خطاب کرتے ہوئے پارلیمنٹ ممبر ڈاکٹر فاروق عبداللہ نے کہا’’ چھتیس گڑ میں26سی آر پی اہلکاروں کو ہلاک کیا گیا،اس پر اتنا شور نہیں مچایا گیا جتنا کپوارہ میں3 اہلکاروں پر کیا گیا،اور اس پر بینڈ بجایا جا رہا ہے‘‘۔مسئلہ کشمیر کے حل کیلئے مذاکراتی عمل کو لازمی قرار دیتے ہوئے نیشنل کانفرنس کے صدر نے تنازعہ کشمیر کے تصفیہ اور خطے میں دیرپا امن کیلئے بات چیت کو واحد راستہ قرار دیا۔انہوں نے کہا’’بم چلائے یا گولیاں،بات چیت کے علاوہ اور کوئی راستہ نہیں ہے‘‘۔سپریم کورٹ میں مرکزی سرکار کی طرف سے علیحدگی پسندوں کیساتھ بات چیت نہ کرنے کے موقف پر تشویش اور افسوس کا اظہار کرتے ہوئے ڈاکٹر فاروق عبداللہ نے کہا کہ نئی دلی کا یہ طریقہ کار ریاست کے مستقبل کیلئے بہت خطرناک ثابت ہوسکتا ہے۔سابق وزیر اعلیٰ نے کہا کہ افسوس کی بات ہے کہ وزیر اعظم سے ملاقات کے بعد پی ڈی پی وزیر اعلیٰ محبوبہ مفتی نے کہا کہ ’’مذاکرات شروع کئے جائیں ورنہ کرسی چھوڑ دوں گی‘‘،تاہم حکمران جماعت پی ڈی پی کے اتحادیوں نے محبوبہ مفتی کے اس بیان کے صرف 2دن گزرنے کے بعد عدالت عظمیٰ میں علیحدگی پسندوں کیساتھ مذاکرات کرنے سے قطعی انکار کردیا۔ ڈاکٹر فاروق عبداللہ نے پی ڈی پی کو ہدف تنقید بناتے ہوئے کہا کہ اگر اس جماعت کی نیت صاف ہوتی تو وزیر اعلیٰ محبوبہ مفتی مرکز کے اس موقف پر کرسی کو لات مار تی تاہم’’ کرسی چھوڑنا تو دور کی بات پی ڈی پی والوں نے مرکز کے اس موقف کیخلاف لب کشائی تک نہیں کی‘‘۔انہوں نے مسئلہ کشمیر کے سیاسی حل کیلئے تمام فریقین کیساتھ بات چیت کو لازمی قرار دیتے ہوئے کہا کہ مزاحمتی خیمہ اسکا لازم و ملزوم حصہ ہیں۔ریاست کے حالات کو انتہائی تشویشناک قرار دیتے ہوئے ڈاکٹر فاروق عبداللہ نے کہا کہ آج ہمارے بچے، جو ہمارا مستقبل ہیں، دانشگاہیں چھوڑ کر سڑکوں پر آنے پر مجبور ہوگئے ہیں اور شمال و جنوب میں بچوں کا اس طرح سے سڑکوں پر آکر احتجاج کرنا اپنی کہانی خود بیان کرتا ہے ۔ ڈاکٹر فاروق عبداللہ نے کہا کہ کشمیریوں کو دبانے کی خوب کوشش کی جارہی ہے، لیکن ’’میں یہ بات صاف کردینا چاہتا ہوں کہ دھونس و دبائو کی پالیسی نہ تو ماضی میں کامیاب ہوئی ہے اور نہ ہی حال میں ہوگی اور نہ ہی کبھی مستقبل میں ہوگی بلکہ اس سے مزید آگ بھڑکے گی‘‘۔ ہندوستان اور پا کستان کی دوستی کی اہمیت کو اجاگر کرتے ہوئے کہا کہ دونوں پڑوسیوں کے درمیان اچھے تعلقات نہ صرف دونوں ممالک کے لوگوں کیلئے سود مند ہے بلکہ اسی میں آر پار کشمیریوں کے تحفظ اور مسئلہ کشمیر کے حل کا راز بھی اسی میں مضمر ہے۔ اس موقعہ پرعلی محمد ساگر، ڈاکٹر شیخ مصطفیٰ کمال،ناصر اسلم وانی ، شریف الدین شارق اور محمد اکبر لون نے خطاب کیا ۔
بات چیت سے اعراض تباہی کا پیش خیمہ،حریت مذاکرات کا بنیادی حصہ
