بابہ ڈیمب سڑک کھنڈرات میں تبدیل

 سرینگر// بربرشاہ سے بابہ ڈیمب جانے والی سڑک کی تجدید و مرمت نہ ہونے کی وجہ سے یہ سڑک کھنڈرات میں تبدیل ہوچکی ہے جس کی وجہ سے نہ صرف پیدل چلنے والوں بلکہ نجی گاڑیوں میں سفر کرنے والے لوگوںکوبھی پریشانیوں کا سامنا کرنا پڑ رہا ہے۔مقامی لوگوں کا کہنا ہے کہ سڑک کا ایک حصہ ڈرین کی تعمیر کے بعد پچھلے کئی برسوں سے خستہ پڑا ہے اوراس سڑک پر ٹریفک زیادہ ہونے کی صورت میں یہ سڑک کبھی بھی کسی بڑے حادثے کا سبب بن سکتی ہے۔ انہوں نے کہا کہ پچھلے ایک سال سے ڈرین کی تعمیر مکمل ہونے کے باوجود بھی سڑک کی مرمت نہیں کی جارہی ہے۔انہوںنے بتایا کہ بارش کے دنوںمیں یہ سڑک لوگوں کیلئے کافی پریشانی کا سبب بنتی ہے کیونکہ سڑک پر پانی جمع ہونے کی صورت میں بدبو پورے علاقے میں پھیل جاتی ہے۔ مقامی شہری سجاد احمد کے مطابق ایک جانب سڑک مکمل طور پر ناقابل آمدورفت ہوچکی ہے جبکہ اسی سڑک پر فائر اسٹیشن موجود ہے اور خدانخواستہ اگر کہیں آگ لگی ہوتی ہے تو آگ بجھانے کی گاڑی کو بڑی مشکل درپیش آتی ہے۔ لوگوں کا کہنا ہے کہ اس اہم سڑک کی تجدید و مرمت نہیں کی جارہی ہے اور نہ ہی گرمی کے موسم کے آخری دنوں میکڈیم بچھانے کے عمل میں کوئی پیش رفت کی جارہی ہے۔مقامی باشندگان نے سڑک کی فوری تجدیدو مرمت کی مانگ کی ہے۔