یو این آئی
لاہور /پاکستانی کرکٹ ٹیم کے بلے باز بابر اعظم نے جنوبی افریقہ کے خلاف ٹی ٹونٹی سیریز کے پہلے میچ میں شاہد آفریدی کا ناپسندیدہ ریکارڈ برابر کر دیا۔ جنوبی افریقہ کیخلاف پہلے ٹی ٹونٹی میچ میں بابر اعظم صرف دو گیندوں پر بغیر کوئی رن بنائے آؤٹ ہوگئے ، انہیں کوربن بوش نے پاور پلے کے آخری اوور میں شکار کیا۔ اس اننگز کے ساتھ بابر اعظم نے ٹی ٹونٹی انٹرنیشنل میں آٹھویں مرتبہ صفر پر آؤٹ ہونے کا شاہد آفریدی کا ناپسندیدہ ریکارڈ برابر کر دیا۔ 8 ویں مرتبہ صفر پر آؤٹ ہونے کے بعد بابر اعظم ٹی ٹونٹی انٹرنیشنل میں سب سے زیادہ مرتبہ صفر پر آؤٹ ہونے والے پاکستانی کھلاڑیوں کی فہرست میں شاہد آفریدی کے ساتھ تیسرے نمبر پر آگئے ۔ اس فہرست میں عمر اکمل 10 بار صفر پر آؤٹ ہو کر پہلے نمبر پر موجود ہیں جبکہ صائم ایوب 9 بار صفر پر آؤٹ ہو کر دوسرے نمبر پر ہیں۔ شاہد آفریدی اس فہرست میں بابر کے ساتھ مشترکہ طور پر تیسرے ، کامران اکمل اور محمد حفیظ 7،7 بار صفر پر آؤٹ ہو کر مشترکہ طور پر پانچویں نمبر پر موجود ہیں۔ یاد رہے کہ میچ میں جنوبی افریقہ نے 55 رنز سے کامیابی حاصل کی ہے ۔ 195 رنز کے ہدف کے تعاقب میں پاکستان کی پوری ٹیم 18.1 اوورز میں 139 رنز پر ڈھیر ہوگئی۔ جنوبی افریقہ کی جانب سے کوربن بوش نے چار وکٹیں حاصل کیں جبکہ ریزا ہینڈرکس نے 40 گیندوں پر 60 رنز کی شاندار اننگز کھیل کر ٹیم کو اچھا آغاز فراہم کیا۔
