عظمیٰ نیوز سروس
نئی دہلی//مرکزی وزیر داخلہ کل یعنی منگل 9جنوری کو جموں کا دورہ کریں گے جس کے دوران وہ کئی ترقیاتی پروگراموں میں شرکت کریں گے اور شہر میں ایک ای-بس سروس کو جھنڈی دکھائیں گے۔21دسمبر کو پونچھ میں ملی ٹینٹوں کے ہاتھوں فوج کی دو گاڑیوں پر گھات لگا کر حملہ میں 4 فوجیوں کی ہلاکت کے بعد یہ شاہ کا جموں و کشمیر کا پہلا دورہ ہو گا۔ایک دن بعد پونچھ ضلع میں 3 شہریوں کی لاشیں ملیں جنہیںپوچھ تاچھ کرنے کیلئے فورسز نے اپنے ساتھ لیا تھا اور جن کی ٹارچر کے ذریعہ مبینہ موت ہوئی ۔یاد رہے کہ شاہ نے 2 جنوری کو نئی دہلی میں مرکزی حکومت اور جموں و کشمیر انتظامیہ کے اعلی عہدیداروں کے ساتھ جموں و کشمیر کی سیکورٹی صورتحال کا جائزہ لیا تھا۔اس میٹنگ میں انہوں نے جموں و کشمیر میں انسداد دہشت گردی کی کارروائیوں کو مضبوط بنانے کی ہدایت دی تھی اور دہشت گردی کے ماحولیاتی نظام کے مکمل خاتمے پر زور دیا تھا۔مرکز کے زیر انتظام علاقوں میں حساس علاقوں میں مناسب تعیناتی کے لیے سیکورٹی ایجنسیوں کو مشورہ دیتے ہوئے، شاہ نے زور دیا کہ انسداد دہشت گردی کی کارروائیوں سے نمٹنے کے دوران تمام مناسب طریقہ کار کو اپنایا جانا چاہیے۔اس میٹنگ میں لیفٹیننٹ گورنر منوج سنہا، قومی سلامتی مشیر اجیت ڈوول، چیف آف آرمی اسٹاف جنرل منوج پانڈے اور انٹیلی جنس اور دیگر سیکورٹی ایجنسیوں کے اعلی حکام نے شرکت کی۔وزارت داخلہ کے ایک عہدیدار نے بتایا کہ وزیر داخلہ 9 جنوری کو جموں کا دورہ کریں گے جس کے دوران وہ جموں و کشمیر کی جامع ترقی پر ایک جائزہ اجلاس کی صدارت کریں گے۔جموں دورے کے دوران امیت شاہ وکاس بھارت سنکلپ یاترا کا آغاز کریں گے، جو ایک مرکزی حکومت کی پہل ہے، ایک ای-بس سروس کو جھنڈی دکھائیںگے اور مختلف ترقیاتی کاموں کا افتتاح اور سنگ بنیاد رکھیں گے۔اہلکار نے بتایا کہ وزیر داخلہ مختلف سرکاری ملازمتوں کے لیے منتخب کیے گئے نوجوانوں میں تقرری خط بھی تقسیم کریں گے۔
جموں میں خراب موسم | جے پی نڈا کا دورہ منسوخ
عظمیٰ نیوز سروس
جموں// بی جے پی صدر جے پی نڈا کا اتوار کو جموں کا طے شدہ دورہ “خراب موسم” کی وجہ سے منسوخ کر دیا گیا۔پارٹی صدر رویندر رینا نے آخری لمحات میں نڈا کے جموں کے دورے کی منسوخی کی تصدیق کی جب ان کی پرواز جموں ہوائی اڈے پر خراب موسم کی وجہ سے اترنے میں ناکام ہوگئی۔نڈا کو تاریخی رگھوناتھ مندر میں پوجا کرنے کے بعد اگلے لوک سبھا انتخابات کے لیے پارٹی کی حکمت عملی پر تبادلہ خیال اور حتمی شکل دینے کے لیے بی جے پی کے ایک توسیعی کور گروپ کی میٹنگ کی صدارت کرنے کے لیے ایک دن کے دورے پر جموں پہنچنے والے تھے۔ہوائی اڈے پر خراب روشنی نے بی جے پی صدر کا جموں دورہ منسوخ کرنے پر مجبور ہونا پڑا۔ رینا نے کہا تاہم، وہ جلد ہی ورچوئل موڈ کے ذریعے سینئر لیڈروں کی میٹنگ کریں گے،” ۔رینا نے انتظار کرنے والے کارکنوں کو نڈا کے دورہ کی منسوخی کے بارے میں مطلع کرنے کے لیے رگھوناتھ مندر کا بھی دورہ کیا۔
