یواین آئی
نئی دہلی//دفاعی سکریٹری راجیش کمار سنگھ اور نیشنل کیڈیٹ کور (این سی سی) کے ڈائریکٹر جنرل لیفٹیننٹ جنرل ویرندر وتس نے ہفتہ کے روز یہاں قومی جنگی یادگار پر این سی سی کی جانب سے شہیدوں کو خراجِ عقیدت پیش کیا۔ وزارت دفاع نے ایک بیان میں کہا کہ این سی سی اتوار کو اپنا 78واں یومِ تاسیس منا رہی ہے، جس موقع پر ملک بھر میں کئی پروگرام منعقد کیے جائیں گے۔ان پروگراموں کا آغاز کرتے ہوئے آج قومی جنگی یادگار میں ایک شاندار تقریب منعقد کی گئی، جس میں این سی سی کی طرف سے شہیدوں کو خراجِ عقیدت پیش کیا گیا۔تینوں افواج کی تین این سی سی کیڈٹ لڑکیوں نے بھی پھول چڑھا کر شہیدوں کو خراجِ عقیدت پیش کیا اور ملک کے ہیروز کے احترام کے لیے سینئر قیادت کے ساتھ شامل ہوئیں۔ تقریب کے بعد دفاعی سکریٹری، این سی سی کے ڈائریکٹر جنرل اور موجود شرکاء نے دہلی کے مختلف اسکولوں سے آئے این سی سی کیڈٹس کی بینڈ پریزنٹیشن دیکھی، جس نے اس یادگاری تقریب کو مزید شاندار بنا دیا۔
