سرینگر//حضرت بل سرینگر میں موجود نیشنل انسٹی ٹیوٹ آف ٹیکنالوجی (این آئی ٹی ) میں آتشزدگی کی ایک بھیانک واردات کے دوران جہلم ہوسٹل بلاک کے 6کمرے خاکستر ہوگئے۔پولیس کے اعلیٰ حکام نے کشمیر عظمیٰ کو بتایا کہ ہفتے اور اتوار کی درمیانی شب رات 12 بجکر 15 منٹ پر نیشنل انسٹی ٹیوٹ آف ٹیکنالوجی حضرت بل میں موجود جہلم ہوسٹل بلاک سے آگ نمودار ہوئی جس کی لپیٹ میں ہوسٹل کے چھ کمرے آگئے۔ محکمہ فائر اینڈ ایمرجنسی کی کوشش اور محنت کے بعد آگ پر قابو پایا گیا۔آگ کی اس واردات کے دوران جہلم ہوسٹل بلاک اے کے 6 کمرے ان میں موجود ضروری سامان اور ر لابی مکمل طورپر خاکستر ہوئے ہیں۔انہوں نے کہاکہ آگ بجھانے کی کارروائی کے دوران کسی کے زخمی ہونے کے بارے میں کوئی اطلاع موصول نہیں ہوئی۔پولیس نے آگ لگنے کی وجوہات جاننے کی خاطر مقدمہ درج کرکے مزید تحقیقات شروع کر دی ہے ۔
این آئی ٹی حضرت بل میں بھیانک آتشزدگی | جہلم ہوسٹل کے 6کمرے اور لابی خاکستر :حکام
