یو این آئی
سرینگر// این آئی اے ایکٹ کے تحت نامزد کولگام کی ایک خصوصی عدالت نے سال گذشتہ ایک استانی رجنی بالا اور ایک بینک منیجر وجے کمار سمیت مختلف جرائم اور ٹارگٹ ہلاکتوں کے مقدمات میں ملوث 5 سرگرم ملی ٹینٹوں کو اشتہاری مجرم قرار دیکر انہیں خود سپردگی کی پیشکش کی ہے۔ پولیس ترجمان نے ایک بیان میں بتایا کہ ایس آئی یو کشمیر کی درخواست پر پانچ ملی ٹینٹوں کے خلاف اعلامیہ جاری کیا گیا ہے۔
بیان میں ان کی شناخت ارجمند گلزار عرف حمزہ ولد گلزار احمد ڈار ساکن بٹہ پورہ رتنی پورہ پلوامہ،بلال احمد بٹ ولد غلام رسول بٹ ساکن چک چولنڈ شوپیان، سمیر احمد شیخ عرف کامران بھائی ولد فاروق احمد شیخ چک چولنڈ شوپیان، عابد رمضان شیخ ولد محمد رمضان شیخ ساکن چھوٹی پورہ شوپیان اور باسط امین بٹ ولد محمد امین بٹ ساکن فرصل کولگام کے بطور کی گئی ہے۔بیان میں کہا گیا ہے کہ اعلامیہ جاری کرنے سے قبل عدالت نے مذکورہ ملی ٹینٹوںکے خلاف غیر ضمانتی وانٹ بھی جاری کیا ہے۔
پولیس بیان کے مطابق یہ علامیہ احکامات مذکورہ جنگجوئوں کے آبائی گائوں میں نمایاں مقامات پر پڑھی گئیں اور اعلامیہ کی کاپیاں ان کی رہائش جگہوں، مکانات اور نمایاں جگہوں پر چسپاں کی گئیں۔بیان میں کہا گیا کہ مذکورہ جنگجوئوں کے خلاف مزید قانونی کارروائیاں انجام دینے سے قبل عدالت نے ان کو عدالت یا تحقیقاتی ایجنسی کے سامنے سرنڈر کرنے کا موقع دیا ہے۔پولیس بیان کے مطابق ایس آئی یو کی ٹیمیں مقامی پولیس اور مجسٹریٹوں کے ہمراہ کولگام، شوپیان اور پلوامہ میں مذکورہ جنگجوئوں کے آبائی گائوں گئیں۔انہوں نے کہا کہ اس دوران ایس او پیز پر من و عن عمل کیا گیا۔
