عظمیٰ یاسمین
تھنہ منڈی// تھنہ منڈی حلقے کے رکنِ اسمبلی مظفر اقبال خان نے تھنہ منڈی کا تفصیلی دورہ کیا۔ اس دوران انہوں نے مقامی سرکاری ہسپتال سمیت متعدد سرکاری دفاتر اور عوامی مقامات کا معائنہ کیا۔ اس موقع پر ان کے ہمراہ بلاک میڈیکل آفیسر درہال ڈاکٹر رخسانہ جبین، زونل میڈیکل آفیسر ڈاکٹر صغیر انجم، ایگزیکٹو آفیسر میونسپل کمیٹی یوسف السلام، بلاک ڈیولپمنٹ آفیسر قدیر چاڑک اور دیگر متعلقہ افسران موجود تھے۔ اپنے دورے کے دوران ایم ایل اے مظفر اقبال خان نے سب سے پہلے سب ڈسٹرکٹ ہسپتال تھنہ منڈی کا جائزہ لیا، جہاں انہوں نے طبی عملے کی کمی، بنیادی ادویات کی قلت، طبی آلات کی عدم دستیابی اور دیگر سہولیات کے فقدان کا بغور مشاہدہ کیا۔ انہوں نے ہسپتال کے مختلف شعبوں کا دورہ کرتے ہوئے مریضوں اور ان کے تیمارداروں سے براہِ راست بات چیت کی اور ان کے مسائل سنے۔ ایم ایل اے نے موقع پر موجود محکمہ صحت کے افسران کو ہدایت دی کہ ہسپتال میں بنیادی سہولیات کی فوری فراہمی کو یقینی بنایا جائے۔ انہوں نے کہا کہ عوام کو بہتر طبی سہولیات فراہم کرنا حکومت کی اولین ترجیح ہے اور اس مقصد کے لئے ہر ممکن وسائل فراہم کئے جائیں گے۔ انہوں نے اس امر کا بھی اعادہ کیا کہ تھنہ منڈی ہسپتال کو جلد ہی جدید سہولیات سے آراستہ کیا جائے گا اور عملے کی کمی کو ترجیحی بنیادوں پر پورا کیا جائے گا۔ بعد ازاں، مظفر اقبال خان نے تھنہ منڈی کے مختلف سرکاری دفاتر، بلدیاتی اداروں اور بلاک ڈیولپمنٹ دفتر کا دورہ کیا۔ انہوں نے ان اداروں میں جاری ترقیاتی منصوبوں کا جائزہ لیا اور عملے سے کام کی رفتار اور معیار کے بارے میں معلومات حاصل کیں۔ دورے کے دوران انہوں نے متعدد عوامی وفود سے ملاقات کی، جنہوں نے بجلی، پانی، سڑکوں کی حالت، صفائی اور دیگر بنیادی سہولیات سے متعلق مسائل پیش کئے۔ ایم ایل اے نے عوامی شکایات کو بغور سننے کے بعد متعلقہ محکموں کو فوری کارروائی کی ہدایات جاری کیں اور کہا کہ تھنہ منڈی کی ہمہ جہت ترقی ان کی ترجیحات میں شامل ہے۔ انہوں نے یقین دہانی کرائی کہ عوامی مسائل کا مستقل اور مؤثر حل حکومت کی پالیسی کا حصہ ہے، اور اس ضمن میں کسی قسم کی کوتاہی برداشت نہیں کی جائے گی۔ مقامی عوام نے ایم ایل اے کے دورے کا خیرمقدم کیا اور ان کے بروقت اقدامات کو سراہتے ہوئے امید ظاہر کی کہ تھنہ منڈی اور اس کے نواحی علاقوں میں ترقیاتی کاموں کو مزید رفتار ملے گی۔
