عظمیٰ نیوز سروس
جموں //سائنس اور ٹیکنالوجی کے مرکزی وزیر مملکت ڈاکٹر جتیندر سنگھ نے جموں میں ایمز پروجیکٹ کی تعمیر کا جائزہ لیتے ہوئے امید ظاہر کی کہ جلد ہی جموں صوبہ میں بہتر صحت سہولیات میسر ہونگی ۔اس دوران موصوم نے ایمز انتظامیہ اور سی پی ڈبلیو ڈی کو ہدایات جاری کیں کہ وہ ایمز پروجیکٹ کو جلد از جلد مکمل کریںتاکہ اس کا باقاعدہ افتتاح ہوسکے۔ انہوں نے انتظامیہ سے کہا کہ وہ اپنی کوششوں کو دوگنا کریں اور ڈبل شفٹوں میں چوبیس گھنٹے کام کریں۔ڈاکٹر جتیندر سنگھ نے کہا کہ وزیر اعظم نریندر مودی کی قیادت میں مرکزی حکومت نے مرکز کے زیر انتظام علاقے کے لوگوں کو صحت کی بہتر سہولیات فراہم کرنے کی امید کے ساتھ جموں و کشمیر کے لئے دو ایمز کی منظوری دی تھی۔ وزیر موصوف نے اس بات پر زور دیا کہ میڈیکل انسٹی چیوٹ کی جلد تکمیل کے ساتھ ہی حکومت جموں صوبہ کے لوگوں اور بالخصوص ملحقہ علاقوں کے لوگوں کے لئے بہترین صحت کی سہولت کو وقف کر سکے گی۔اس موقع پرذرائع ابلاغ کے نمائندوں سے بات چیت کے دوران وزیر مملکت نے کشمیر اور ملک کے باقی حصوں کے درمیان ریل لائن، ایمز، پرپل انقلاب، جموں و کشمیر میں ریکارڈ تعداد میں سیاحوں کی آمد اور ماتا ویشنو دیوی میں عقیدت مندوں کی آمد میں اضافہ جیسے مختلف منصوبوں کی تکمیل کا ذکر کیا۔قبل ازیں ڈاکٹر جتیندر سنگھ نے آیوش بلاک کنونشن سنٹر، او پی ڈی بلاک، ہسپتال بلاک اور ایمرجنسی بلاک کا دورہ کیا تاکہ تعمیرات اور دیگر کاموں کا موقع پر معائنہ کیا جا سکے۔ انہوں نے متعلقہ افراد کو ضروری تبدیلیاں کرنے کی ہدایت کی تاکہ ادارہ صحت کی بہترین سہولیات فراہم کرنے کے لئے بڑی آبادی کو فائدہ پہنچا سکے۔ڈاکٹر جتیندر سنگھ نے کہا کہ ایمز جموں ایک سٹیٹ آف دی آرٹ پروجیکٹ ہے جو اسے ملک کے باقی حصوں میں اسی طرح کے پروجیکٹوں کے مقابلے میں ایک خاص بناتا ہے۔ انہوں نے فیکلٹی، طلباء کے لئے ریزیڈنشیل کمپلیکس اور تمام جدید سہولیات کے ساتھ مکمل ہونے والے دیگر رہائشی منصوبوں پر اطمینان کا اظہار کیا۔پروجیکٹ کے لئے چیف انجینئر سی پی ڈبلیو ڈی مکیش مینا نے بتایا کہ ایمز جموں ہسپتال کمپلیکس کا کل رقبہ 226.84 ایکڑ ہے جس میں سے 96 ایکڑ میں نارتھ پارسل کے لئے ہسپتال میڈیکل کالج، کنونشن سینٹر، آیوش بلاک اور رات کی پناہ گاہیں ہیں۔ 130.84 ایکڑ رقبے پر پھیلے ہوئے جنوبی پارسل میں سٹوڈنٹ ایکٹیویٹی سینٹر، اسپورٹس سینٹر، رہائشی ہاسٹل اور گیسٹ ہاوس جیسے کمپلیکس ہیں۔
