عظمیٰ نیوز سروس
سرینگر// جموں و کشمیر قانون ساز اسمبلی کے سپیکر عبدالرحیم راتھر نے منگل کو قانون سازوں سے کہا کہ وہ ان محکموں سے متعلق سوالات نہیں پوچھ سکتے، جو لیفٹیننٹ گورنر کے کنٹرول میں ہیں۔ ہوم ڈیپارٹمنٹ سے متعلق ایک سوال کا حوالہ دیتے ہوئے، سپیکر نے وضاحت کی کہ ایم ایل اے لنگیٹ شیخ خورشید کی طرف سے پوچھے گئے سوال کو حذف کرنا پڑا کیونکہ یہ ایک ایسے محکمے کے بارے میں ہے جو ری آرگنائزیشن ایکٹ کے تحت ایل جی کے دائرہ اختیار میں ہے۔عوامی اتحاد پارٹی کے خورشید نے حکومت سے جموں و کشمیر میں تشدد کے متاثرین کے خاندانوں کو ایس آر او 43 کے تحت ایکس گریشیا ادائیگیوں/ فوائد کی فراہمی میں “غیر معمولی تاخیر” کی وجوہات پوچھی تھیں۔ایم ایل اے نے چند معاملات کا خصوصی حوالہ دیا تھا اور حکومت سے کہا تھا کہ وہ ان متاثرین کے قریبی رشتہ داروں کے حق میں معاوضے کے دعووں کے لیے ایک ٹائم لائن فراہم کرے۔
