عظمیٰ نیوز سروس
جموں// لیفٹیننٹ گورنر منوج سنہا نے راج بھون میں محکمہ داخلہ کے کام کاج کا جائزہ لینے کے لیے ایک اعلیٰ سطحی میٹنگ کی صدارت کی۔ان کو سیکورٹی سے متعلق اخراجات، افرادی قوت کی پوزیشننگ، انفراسٹرکچر ورکس، اور ہوم اور ماتحت محکموں بشمول پولیس، جیل خانہ جات، فائر اینڈ ایمرجنسی سروسز، ہوم گارڈز، ایس ڈی آر ایف، پراسیکیوشن اور فرانزک سائنسز کے دیگر اہم امور کے بارے میں بریفنگ دی گئی۔لیفٹیننٹ گورنر نے سیکورٹی اور امن و امان سے متعلق چیلنجوں سے مثبت طریقے سے نمٹنے کے لیے پولیس اور اس سے منسلک اداروں کو جدید اور مضبوط بنانے پر زور دیا۔ انہوں نے مزید ہدایت کی کہ تمام پروجیکٹس کو مقررہ مدت میں مکمل کیا جائے۔میٹنگ میں موثر جیل مینجمنٹ، انسانی وسائل، اندرونی سلامتی اور فوجداری نظام انصاف سے متعلق دیگر امور پر بھی تبادلہ خیال کیا گیا۔چیف سکریٹری، اتل ڈلو، پرنسپل سکریٹری، ہوم، چندرکر بھارتی، ڈی جی پی نلین پربھات، ڈی جی پی جیل خانہ جات،اے ڈی جی پی ہیڈکوارٹر، لا اینڈ آرڈر، اے ڈی جی پی سی آئی ڈی، لیفٹیننٹ گورنر کے پرنسپل سکریٹری، آئی جی پی کشمیر، ودھی کمار بردی اور جموں و کشمیر پولیس کے دیگر سینئر افسران موجود تھے۔
