عظمیٰ نیوزسروس
لیہہ//لداخ کے لیفٹیننٹ گورنر کویندر گپتا نے لیہہ میں سیکورٹی کی موجودہ صورتحال کا جائزہ لینے کے لیے ایک اعلیٰ سطحی جائزہ میٹنگ کی صدارت کی۔میٹنگ میں چیف سکریٹری ڈاکٹر پون کوتوال، ڈائرکٹر جنرل آف پولیس ڈاکٹر ایس ڈی۔ سنگھ جموال، راجیش کمار، ایڈیشنل ڈائریکٹر جنرل، سی آر پی ایف؛ اور فوج اور انڈو تبت بارڈر پولیس کے سینئر افسران موجود تھے۔افسران نے لیفٹیننٹ گورنر کو مرکز کے زیر انتظام علاقے میں امن و امان کو برقرار رکھنے کے لیے تازہ ترین پیش رفت، تیاری کے اقدامات اور ایجنسیوں کے درمیان تال میل کے بارے میں آگاہ کیا۔میٹنگ کے دورانلیفٹیننٹ گورنر نے امن و امان کو برقرار رکھنے کی بنیادی اہمیت پر زور دیا، اس بات کا اعادہ کیا کہ انتظامیہ لداخ کے امن، ہم آہنگی اور استحکام کو خراب کرنے کی کسی بھی کوشش کو برداشت نہیں کرے گی۔ انہوں نے سماج دشمن اور خلل ڈالنے والے عناصر کو ایک مضبوط اور واضح پیغام جاری کرتے ہوئے متنبہ کیا کہ جو بھی تشدد بھڑکانے یا بدامنی پھیلانے کی کوشش کرتا پایا گیا اس کے خلاف سخت کارروائی کی جائے گی۔لیفٹیننٹ گورنر نے لداخ کے لوگوں کو ان کے حقوق، امنگوں اور ثقافتی شناخت کے تحفظ کے لیے انتظامیہ کے مکمل عزم کا یقین دلایا۔ انہوں نے شہریوں سے اپیل کی کہ وہ پرسکون رہیں، حکام کے ساتھ تعاون کریں اور لداخ کی امن، بھائی چارے اور باہمی احترام کی پرانی روایات کو برقرار رکھیں۔انہوںنے کہا’’لداخ اس کے لوگوں کا ہے، اور حکومت ان کی حفاظت، سلامتی اور خوشحالی کو یقینی بنانے میں مقامی لوگوں کے ساتھ مضبوطی سے کھڑی ہے۔ ہم مل کر کسی بھی تفرقہ انگیز قوت کو اس خطے کے امن اور ترقی کو پٹڑی سے اتارنے کی اجازت نہیں دیں گے‘‘۔لیفٹیننٹ گورنر نے سیکورٹی ایجنسیوں کو سخت چوکسی برقرار رکھنے، کوارڈی نیشن کو مضبوط بنانے اور کسی بھی ابھرتے ہوئے چیلنجز کا فوری جواب یقینی بنانے کی ہدایت کی۔ انہوں نے مزید زور دیا کہ انتظامیہ کی ترجیح عوام کے مفادات کا تحفظ ہے جبکہ ترقی اور ہم آہنگی کے لیے سازگار ماحول کو یقینی بنانا ہے۔
