عظمیٰ نیوز سروس
سرینگر// لیفٹیننٹ گورنر منوج سنہا ،وزیراعلیٰ عمر عبداللہ، وزیر برائے صحت و طبی تعلیم، سماجی بہبود اور تعلیم سکینہ اِیتو،نیشنل کانفرنس صدر ڈاکٹر فاروق عبداللہ،پی ڈی پی سربراہ محبوبہ مفتی نے عوام کو عیدالاضحی پر مبارکباد دی ہے۔لیفٹیننٹ گورنر منوج سنہا نے مبارکباد پیش کرتے ہوئے کہا کہ عید الاضحی کے پرمسرت موقع پر لوگوں کو دل کی گہرائیوں سے مبارکباد اور نیک خواہشات۔انہوں نے کہا کہ عید ایثار و استغفار کے جذبے کو تقویت دیتی ہے۔ آئیے ہم معاشرے میں اتحاد، ہم آہنگی اور بھائی چارے کی بنیادوں کو مضبوط کرنے کے اپنے عزم کا اعادہ کریں اور سب کی بھلائی کو یقینی بنانے کے لیے محبت اور شفقت کے ساتھ کام کریں۔وزیر اعلیٰ عمر عبداللہ نے مبارکباد پیش کرتے ہوئے امن، بھلائی اور خوشحالی کی دعا کی۔ اپنے پیغام میں وزیراعلیٰ نے کہا کہ یہ مقدس موقع ہمارے اندر ایمانداری اور سچائی کو زندگی گزارنے کا جذبہ پیدا کرتا ہے۔انہوں نے کہا کہ یہ تہوار حضرت ابراہیم ؑاور ان کے عقیدت مند فرزند حضرت اسماعیل ؑکی قائم کردہ مکمل ایمان اور غیر متزلزل اطاعت کی لازوال مثال کی یاد دلاتا ہے۔عید الاضحی نہ صرف ایمان کا جشن ہے بلکہ عمیق قربانی اور اللہ تعالی کی مرضی کے سامنے مکمل سر تسلیم خم کرنے کی یاددہانی بھی ہے۔انہوں نے کہا ’’ حضرت ابراہیم ؑکا غیر متزلزل اعتماد اور حضرت اسماعیل ؑکی رضامندی سے اطاعت ہمیں بے لوثی، لگن اور ثابت قدمی کے جوہر سکھاتی ہے‘‘۔انہوں نے امید ظاہر کی کہ یہ مبارک موقع پورے خطے میں فرقہ وارانہ ہم آہنگی، باہمی بھائی چارے، بھائی چارے اور امن کے رشتوں کو مزید مضبوط کرے گا۔ وزیر برائے صحت و طبی تعلیم، سماجی بہبود اور تعلیم سکینہ ایتو نے مبارکباد پیش کرتے ہوئے کہا کہ عید الاضحی نہ صرف ایمان اور عقیدت کی تقریب ہے بلکہ ہمدردی، اِنکساری اور اِتحاد کے لئے اَپنے عزم کا اعادہ کرنے کا وقت بھی ہے۔انہوں نے کہا کہ یہ دِن حضرت ابراہیمؑ کی بے مثال اطاعت اور اللہ تعالیٰ کے حکم کے آگے سرِتسلیم خم کرنے کی یاد دِلاتا ہے جو ہمیںاخلاص، ایثار اور اِنسانیت کی خدمت کی زِندگی گزارنے کا درس دیتا ہے۔یہ ضرورت مندوں کو ہمدردی کے ساتھ گلے لگانے اور اس بات کو یقینی بنانے کا موقع ہے کہ ہماری اِجتماعی خوشیوں میں کوئی پیچھے نہ رہ جائے‘‘۔وزیر موصوفہ نے سب سے اپیل کی کہ وہ اِس عید کو ایک دوسرے کے تئیں نئی ذمے داری کے احساس کے ساتھ منائیں اور ہمارے خطے اور دُنیا بھر میں اَمن، خوشحالی اور ہم آہنگی کیلئے دُعا کریں۔ نیشنل کانفرنس صدر ڈاکٹر فاروق عبداﷲ نے عوام کو مبارکباد پیش کرتے ہوئے کہا کہ یہ دن قربانی اور ایثار کی علامت کی بہت بڑی نشانی ہے اور اِس کا دوسرا کوئی ثانی نہیں ہے۔ انہوں نے کہاکہ موجودہ حالات کے پیش نظر ہمیں یہ عید انتہائی سادگی کے ساتھ منانی چاہئے۔ انہوں نے اہلیان جموں و کشمیر سے اپیل کی کہ وہ عید کے دوران اپنے اُن پڑوسیوں، رشتہ داروں اور دوست و احباب کا خاص خیال رکھیں جن کا روزگار مسلسل بے چینی ،غیر یقینیت اور اقتصادی بدحالی سے بری طرح متاثر ہوئے ہیں۔ڈیموکریٹک پارٹی صدر اور جموں و کشمیر کی سابق وزیر اعلیٰ محبوبہ مفتی نے مبارکباد پیش کی۔انہوں نے کہا کہ قربانی، ہمدردی اور اتحاد کی اقدار پر زور دیا۔مفتی نے عید الاضحی کی تعلیمات پر غور کرنے پر زور دیا، جو حضرت ابراہیمؑ کی عقیدت اور بے لوثی کے جذبے سے متاثر ہے۔ انہوں نے جموں و کشمیر کے لوگوں پر زور دیا کہ وہ بھائی چارے کے بندھن کو مضبوط کریں اور خطے میں جاری چیلنجوں کے درمیان امن اور ہم آہنگی کے لیے کام کریں۔انصاف کی ضرورت پر روشنی ڈالتے ہوئے مفتی نے وزیر اعظم نریندر مودی سے اپیل کی کہ وہ اس موقع کو انسانی ہمدردی کے ساتھ قیدیوں بالخصوص نوجوانوں کو فوری طور پر رہا کرنے کا حکم دیں جنہیں شک یا سنگین الزامات کے بغیر حراست میں لیا گیا ہے۔ اپنی پارٹی کے سربراہ الطاف بخاری نے مبارکباد پیش کرتے ہوئے کہاکہ لوگ اس مقدس موقع پر اپنی خوشیاں ان لوگوں کے ساتھ بھی بانٹئیں جو ضرورت مند ہیں۔اپنے پیغام میں سید محمد الطاف بخاری نے کہا’’ میں عید الاضحی کے اس پروقار موقع پر سب کو دل کی گہرائیوں سے مبارکباد پیش کرتا ہوں۔ یہ مقدس دن حضرت ابراہیم علیہ السلام کی اللہ تعالی سے غیر متزلزل عقیدت کی یاد دلاتا ہے‘‘۔
