ایل او سی پر فائرنگ

راولپنڈی//بھارتی فوج نے لائن آف کنٹرول کی خلاف ورزی کرتے ہوئے چری سیکٹر پر بلااشتعال فائرنگ کی جس کے نتیجے میں 2 شہری جاں بحق اور ایک خاتون زخمی ہوگئی ۔پاک فوج کے شعبہ تعلقات عامہ (آئی ایس پی آر) کے مطابق بھارت کی جانب سے ایک بار پھر سیزفائر معاہدے کی خلاف ورزی کی گئی ہے، بھارتی فورسز نے لائن آف کنٹرل کے چری سیکٹر پر چھفر گاؤں میں ایک جنازے پر فائرنگ کی جس کے نتیجے میں 2 شہری لقمہ اجل اور ایک خاتون زخمی ہوگئی ہیں۔آئی ایس پی آر کے مطابق پاک فوج کی جانب سے بھارتی فوج کی بلااشتعال فائرنگ کا بھرپور جواب دیا گیا اور جوابی فائرنگ میں ایک بھارتی فوجی ہلاک جب کہ 5 زخمی ہوگئے جب کہ جوابی کارروائی میں بھارتی پوسٹ بھی تباہ کردی گئی ہے۔دریں اثناء پاکستان نے کل اسلام آباد میں بھارتی ڈپٹی ہائی کمشنر جے پی سنگھ کو طلب کیا اور لائین آف کنٹرول پر بھارتی فوج کی فائرنگ سے 2افراد کی ہلاکت پر اپنا احتجاج درج کیا ۔