ایل او سی پر فائرنگ،بھمبر میں خاتون جاں بحق

 مظفر آباد //پاکستان کا کہنا ہے کہ بھارت کی جانب سے لائن آف کنٹرول پر پاکستانی علاقے میں بلااشتعال فائرنگ کی گئی جس کی زد میں آکر خاتون جاں بحق ہوگئی۔بھمبر پولیس نے بتایا کہ لوانا کھیتر گاؤں میں سرحد کے اس پار سے کی گئی فائرنگ سے 22 سالہ منزہ بی بی جاں بحق ہوگئی جو دو بچوں کی ماں بھی تھیں۔لوانا کھیتر ایل او سی سے بامشکل ایک کلومیٹر دور ہے۔خاتون کو جمعہ رات گئے بھارتی فوج کی پوسٹ سے فائر کی گئی اسنائپر کی گولی اس وقت لگی جب وہ اپنے گھر کے برآمدہ میں روشنی کی مدد سے کچھ تلاش کر رہی تھیں۔ گولی خاتون کے سر پر لگی جس سے ان کی موقع پر ہی موت واقع ہوگئی۔منزہ بی بی کے جاں بحق ہونے کے بعد رواں سال ایل او سی پر بھارت کی بلااشتعال فائرنگ سے ہلاک ہونے والوں کی تعداد 27 ہوگئی ہے جس میں 19 مرد اور 8 خواتین شامل ہیں۔