ایل او سی پراٹھمقام میں فوجی گاڑی پر فائرنگ، پاکستان کاالزام

 راولپنڈی //بھارتی فوج کی جانب سے کنٹرول لائن (ایل او سی) میں فائرنگ سے گشت پر مامور پاک فوج کی گاڑی اٹھ مقام کے قریب دریائے نیلم پر جا گری جس کے نتیجے میں 4 فوجی اہلکار ڈوب گئے۔پاک فوج کے تعلقات عامہ (آئی ایس پی آر) کے مطابق 'بھارتی فوج نے جنگ بندی کی خلاف ورزی کرتے ہوئے فائرنگ کی جس سے 4 فوجی جاں بحق ہوئے'۔آئی ایس پی آر کے مطابق پاک فوج کی گاڑی دریائے نیلم کے قریب اٹھ مقام میں گشت پر تھی کہ بھارتی فوج نے نشانہ بنایا اور گاڑی دریائے نیلم میں گری جس سے 4 فوجی ڈوب گئے۔دریائے نیلم میں ڈوبنے والے ایک جوان کو میت دریا سے نکال لی گئی جبکہ 3 کی تلاش جاری ہے۔پاک فوج کے اعلامیے کے مطابق گاڑی پرحملہ گزشتہ برس مسافر بس پر کیے گئے حملے کی طرح تھا۔یاد رہے کہ گزشتہ برس نومبر میں وادی نیلم کے علاقے لوات میں بھارتی فوج کی فائرنگ سے بس میں سوار 10 مسافر جاں بحق اور 17 زخمی ہوگئے تھے۔بھارتی فوج نے دسمبر 2016 میں نکیال سیکٹر میں نجی اسکول کی بس کو نشانہ بنایا تھا جہاں ڈرائیور جاں بحق ہوا تھا جبکہ 10 بچیزخمی ہوگئے تھے۔