ایشیا کپ سے قبل کوہلی ذہنی اور جسمانی طور پر تازہ دم ہوں گے: واٹسن

دبئی//آسٹریلیا کے سابق آل راؤنڈر شین واٹسن کا خیال ہے کہ کرکٹ سے ایک ماہ طویل وقفے کے بعد اس ہفتے کے آخر میں شروع ہونے والے ایشیا کپ سے قبل وراٹ کوہلی ذہنی اور جسمانی طور پر تازہ دم ہوں گے۔ کوہلی اپنے کیریئر کے خراب دور سے گزر رہے ہیں اور نومبر 2019 سے بین الاقوامی کرکٹ میں کوئی سنچری نہیں بنائی ہے۔ اسٹار بلے باز ویسٹ انڈیز اور زمبابوے کے خلاف سیریز سے باہر ہونے کے بعد کرکٹ میں واپسی کریں گے۔ واٹسن نے ‘آئی سی سی ریویو شو میں کہا، ‘تھوڑا سا وقفہ یقینی طور پر وراٹ کی مدد کرے گا اور وہ ذہنی اور جسمانی طور پر تروتازہ محسوس کریں گے۔ انہوں نے یہ بھی کہا، ‘آپ دیکھ سکتے ہیں کہ آئی پی ایل (انڈین پریمیئر لیگ) کے دوران ان کی توانائی تھوڑی کم لگ رہی تھی۔ آپ انہیں دیکھ سکتے تھے، چاہے انہوں نے کتنی ہی کوشش کی ہو – وہ ہمیشہ پراعتماد نظرآتے تھے لیکن آپ دیکھ سکتے تھے کہ ان میں کچھ کمی تھی۔ واٹسن نے کہا کہ کوہلی بہترین کھلاڑی ہیں جو فارم میں واپسی کریں گے۔ انہوں نے کہا، ‘وہ اتنے شاندار کھلاڑی ہیں کہ وہ اپنی فارم دوبارہ حاصل کر لیں گے۔ اس کے لیے انھیں چند گیندیں لگیں گی اور وہ پھر سے ایک بہترین کرکٹ کھیلتے ہوئے نظرآئیں گے۔ کوہلی کا گزشتہ دورہ انگلینڈ تھا جس میں وہ تمام فارمیٹس میں صرف 76 رنز بنا سکے تھے۔