عظمیٰ نیوزسروس
جموں//جموں و کشمیر پولیس نے ضلع ادھم پور میں ایک سپیشل پولیس افسر (ایس پی او) کو منشیات فروشی کے الزام میں گرفتار کرکے اس کی تحویل سے ہیرائن جیسا ممنوعہ مواد بر آمد کیا ہے۔ایک پولیس ترجمان نے اپنے ایک بیان میں بتایا کہ پولیس سٹیشن ادھم پور کی ایک ٹیم نے گشت کے دوران پھنگیال علاقے کے نزدیک ایک مشتبہ شخص کو دھر لیا جس نے پولیس کو دیکھ کر فرار ہونے کی کوشش کی۔انہوں نے کہا کہ تلاشی کے دوران اس شخص کی تحویل سے 5.64گرام ہیرائن جیسا مواد بر آمد کیا گیا جس کے بعد اس کی بر سر موقع ہی گرفتاری عمل میں لائی گئی۔بیان کے مطابق گرفتار شدہ کی شناخت وشال سنگھ (جو ضلع پولیس لائنز ادھم پور میں ایس پی او کے طور پر تعینات ہے) ولد جگدیش سنگھ ساکن شکتی نگر اودھم پور کے طور پر کی گئی ہے۔انہوں نے کہا کہ اس سلسلے میں پولیس سٹیشن ادھم پور میں این ڈی پی ایس ایکٹ کے متعلقہ دفعات کے تحت ایک کیس درج کرکے مزید تحقیقات شروع کی گئیں۔
