جموں//وزیر اعلیٰ محبوبہ مفتی اتوار کو دور روزہ دورہ پر جموں پہنچیں جس دوران انہوں نے جہاں درج فہرست ذاتوں کے مشاورتی بورڈ کی صدارت کی وہیں انہوں نے ترقیاتی سرگرمیوں کا جائزہ لیا اور کئی پروجیکٹوں کا سنگ بنیاد رکھا۔نائب وزیراعلیٰ ڈاکٹر نرمل سنگھ ، وزیر صحت و طبی تعلیم بالی بھگت ، وزیر مملکت شہری ترقی آسیہ نقاش ، قانون ساز اسمبلی کے سابق سپیکر محمد سرتاج مدنی ، صوبائی کمشنر جموں ، آئی جی پی جموں و دیگر افسران بھی ان کے ہمراہ تھے۔ اس دوران متعدد مقامی لوگوں اور پنڈت برادری کے افراد نے وزیر اعلیٰ کے ساتھ ملاقات کی۔ وزیر اعلیٰ نے اُن سے سہولیات کے بارے میں اُن کی رائے دریافت کی۔جے اینڈ کے ایڈوائزری بورڈ فار ڈیولپمنٹ آف شیڈول کاسٹس کی ایک جائزہ میٹنگ کی صدارت کرتے ہوئے وزیرا علیٰ محبوبہ مفتی نے بہبودی کی سکیموں کو ایس سی طبقے کے دہلیز پر لے جانے پر زور دیا تاکہ ان سکیموں پر صحیح عمل در آمد یقینی بنائی جاسکے ۔ متعلقہ محکموں کو ان سکیموں کے بارے میں جانکاری مہم چلانے پر زور دیاتاکہ متعلقہ لوگ ان سکیموں سے مستفید ہوسکیں۔محبوبہ مفتی نے مختلف بہبودی کی سکیموں میں مستحقین خاص طور پر طلبہ کے لئے مقرر شدہ معیار کو نئے سرے سے تشکیل دینے کی تجویز رکھی۔انہوںنے ایس سی طبقے کے طلبہ کے لئے وظائف اور کوچنگ سکیموں میں سو فیصد کامیابی حاصل کرنے پر زور دیا ۔ انہوں نے حقیقی درخواست دہندگان کو ایس سی سر ٹیفکیٹ اجر اکرنے کے عمل میں آسانی پیدا کرنے کی بھی ہدایت دی ۔ وزیر اعلیٰ نے متعلقہ ڈپٹی کمشنروں سے کہا کہ وہ مختلف سکیموں اور پروگراموں میں ایس سی بورڈ ممبران کی شراکت کو یقینی بنائیں تاکہ ان سکیموں کی عمل آوری میں بہتری لائی جاسکے ۔انہوںنے ان سکیموں کے لئے مقررہ وقت پر رقومات کی واگزاری کی بھی ہدایت دی تاکہ یہ رقومات زائد المعیاد نہ ہوں ۔ محبوبہ مفتی نے بورڈ ممبران کو یقین دلایا کہ ان کے جائز مطالبات پر غور کیا جائے گا۔ انہوں نے وائس چیئرمین سے کہا کہ وہ مسائل کو موقعہ پر حل کرنے کے لئے ضلعی سطح پر میٹنگیں منعقد کروائیں ۔ اپنے خطاب میں وزیر صحت و طبی تعلیم بالی بھگت نے ایس سی طبقے کی بہبودی کے لئے حکومت کی طرف سے کئے جارہے اقدامات کی تفاصیل پیش کیں ۔ وائس چیئرمین ایس سی ایڈوائزری بورڈ بھوشن ڈوگرہ نے بھی اس موقعہ پر خطاب کیا۔ میٹنگ میںجنرل ایڈمنسٹریشن محکمہ کے کمشنر سیکرٹری خورشید احمد شاہ ،محکمہ سماجی بہبود کے کمشنر سیکرٹری سجاد احمد خان ،مختلف محکموں کے سربراہاں اور سینئر افسروں نے شرکت کی۔
ایس سی مشاورتی بورڈ کااجلاس
