گندو//پولیس اور پبلک کے تعلقات کو مضبوط بنانے کے مقصد سے ایس ایس پی ڈوڈہ زاہد نسیم منہاس نے ایس ڈی پی او گندو اور ایس ایچ او گندو کے ہمراہ تحصیل گندو تحصیل کے کاہل جگاسر علاقہ میں ایک عوامی میٹنگ کا انعقاد کیا جس میںعلاقہ کے سابق پنچوں اور سرپنچوں کے علاوہ سیاسی و سماجی کارکنان اور عام لوگوں نے بھی اچھی خاصی تعداد میں شرکت کی۔اس موقع پر ایس ڈی ایم گندو چوہدری دل میر اور رینج آفیسر بھلیسہ رینج ظفر الہ شیخ اور انچارج پولیس پوسٹ چنگا بھی موجو دتھے۔میٹنگ کے دوران مقامی لوگوں نے پولیس انتظامیہ کو مختلف علاقائی مسائل کے بارے میںجانکاری فراہم کی اور کچھ مطالبات بھی رکھے جن میں علاقہ کے تمام ہیلتھ سینٹروں میںپیرا میڈیکل عملہ،اے این ایم اور لیڈی ڈاکٹر کی تعیناتی اورضرورت کے مطابق ادویات کی سپلائی،زیرِ تعمیر واٹر سپلائی اسکیم کی فوری تکمیل،علاقہ کے لوگوں کو چھ ماہ کا مفت راشن فراہم کرنا،علاقہ کے ہائر اسکنڈری اسکول اور ہائی اسکولوں میں ضرورت کے مطابق تدریسی اور غیر تدریسی عملہ کی تعیناتی،لکڑی کے پرانے بوسیدہ پولوں کی جگہ لوہے کے پولوں کی تنصیب،علاقہ میں خصوصی پولیس بھرتی عمل میں لانا،گندو تا کاہل جگاسر سڑک کی حالات کو سدھارنااور اُس پر میکڈم بچھانا،گاڑیوں میںاُوور لوڈنگ پر قابو پانا اور عمارتی لکڑی کی جلد منظوری کو یقینی بنانا شامل ہیں۔ ایس ایس پی نے شرکائے میٹنگ کو یقین دلایا کہ اُن کے جائز مطالبات کو سول انتظامیہ کی نوٹس میں لایا کر پورا کروانے کی کوشش کی جائے گی اور پولیس سے متعلق اُن کے مسائل کو ترجیحی بنیادوں پر حل کیا جائے گا۔اُنہوں نے سماج میں جرائم کی روک تھام میں سوسائٹی کے رول کی وضاحت کرتے ہوئے کہا کہ معاشرے کو جرائم سے پاک کرنے کے لئے ضروری ہے کہ پولیس اور عوام میں قریبی رابطہ ہو اور لوگ پولیس کو اپنا بھر پور تعاون فراہم کریں۔ جب تک شہری سماج دشمن عناصر کی نشاندہی میں پولیس کے ساتھ تعاون نہ کریں تب تک پولیس کچھ بھی نہیں کر سکتی۔اُنہوں نے کہا کہ عوام کے تعاون سے ہی معاشرہ میں امن قائم ہو سکتا ہے اورشہریوں کو چاہیے کہ وہ امن و امان کی بحالی کے سلسلہ میںپولیس سے تعاون کریں تاکہ سماج میں پھیل رہی برائیوں پر روک لگائی جا سکے اور معاشرے کو جرائم سے پاک کیا جا سکے۔ اُنہوں نے کہا کہ عوام کو انصاف فراہم کرنا پولیس کا فرضِ اولین ہے،مگر یہ اُسی صورت میں ممکن ہے جب اُسے عوام کو بھر پورتعاون حاصل ہو۔اُنہوں نے عوام سے اپیل کی کہ وہ سماجی جرائم کے خاتمہ،منشیات ،مویشیوں، غیر قانونی شراب،لکڑی اور جنگلی جڑی بوٹیوں وغیرہ کی سمگلنگ پر قابو پانے کے لئے پولیس کو اپنا بھر پور تعاون فراہم کریں۔اُنہوں نے علاقہ میں آپسی بھائی چارہ کو مزید مضبوط کرنے،امن و امان کی فضا قائم رکھنے اور فرقہ وارانہ ہم آہنگی کو بنائے رکھنے کی بھی لوگوںسے اپیل کی۔ اُنہوں نے عوام اور پولیس کے درمیان پائی جانے والی دوریوں کو ختم کرنے اور پولیس پبلک تعلقات کو بہتر بنانے کی ضرورت پر زور دیتے ہوئے اپنے ما تحت آفیسران واہلکاران کو ہدایت کی وہ عوام کے ساتھ نزدیکی رابطہ بنائے رکھیں اور عوامی مشکلات کا بروقت ازالہ کریں تاکہ اُنہیں عوامی اعتماد حاصل ہو سکے۔مقامی لوگوں نے پولیس کی طرف سے اس قسم کی میٹنگوں کے انعقاد کو سراہتے ہوئے کہا کہ اس سے نہ صرف یہ کہ پولیس اور عوام کے درمیان پائی جانے والی دوریاں ختم ہوں گی اور آپسی روابط مضبوط ہوں گے بلکہ ان سے عوامی مسائل کو حل کروانے میں بھی بھر پور مد ملے گی۔
ایس ایس پی ڈوڈہ کی سر براہی میں عوامی میٹنگ کا انعقاد
