ایس ایس اے اساتذہ کی دو ماہ کی تنخواہیںواگذار کرنے کااعلان

جموں //ریاستی حکومت نے ایس ایس اے کے تحت آنے والے ریگولر رائزڈ رہبر تعلیم اساتذہ اور ہیڈ ٹیچروں کی نومبر اور دسمبر 2016 ء مہینوں کی التوأمیں پڑی تنخواہیں واگذار کی ہیںاور باقی ماندہ واجبات کو وعدے کے مطابق 30؍ اپریل 2017ء تک کلیئر کیا جائے گا۔ان اساتذہ کی تنخواہیں اکتوبر 2016ء سے بند تھیںاور اس کے لئے رقومات مرکزی اور ریاستی سرکاریں 10:90 فیصد کے تناسب سے فراہم کرتی ہے ۔ریاستی حکومت نے پہلے ہی باقاعدہ رہبر تعلیم اساتذہ اور باقاعدہ ہونے والے رہبر تعلیم اساتذہ کی تنخواہوں کا حصہ پہلے ہی واگذار کیا ہے تاہم انسانی وسائل کو فروغ دینے کی مرکزی وزارت کی طرف سے مرکزی حصے کی سالانہ رقم واگذار نہ کرنے سے ان اساتذہ کی تنخواہیں واگذار کرنے میں مشکلات پیش آرہی ہیں۔سال 2016-17کے لئے مرکز کی طرف سے منظور کردہ 1856کروڑ روپے میں سے ایچ آر ڈی نے ریاست جموں وکشمیر کو صرف 1120کروڑ روپے فراہم کئے ہیں اور یوں ابھی بھی 736کروڑ روپے باقی پڑے ہیں تاہم اپریل مہینے کے آخر تک ان اساتذہ کی تنخواہیں واگذر کرنے کے اپنے وعد ے کو پورا کرتے ہوئے وزیر تعلیم سید الطاف بخاری نے یہ معاملہ ریاستی وزارت ِخزانہ کے ساتھ اُٹھایا جس نے اب سال-18 2017ء کے لئے ریاست کے حصے کے طور پر پوری رقم واگذار کی ہیں۔دریں اثنا وزیر تعلیم نے کہا ہے کہ دومہینوں کی تنخواہ کی رقم واگذار کی گئی ہے اور اس سے چند دنوں میں تقسیم کیا جائے گا۔ اُنہوں نے اس عزم کو دہرایا کہ باقی ماندہ تنخواہیں مستقبل قریب میں واگذار کی جائیں گی۔وزیر تعلیم نے کہا ہے کہ ایس ایس اے کے تحت کام کرنے والے اساتذہ کو تنخواہوں کی وقت پر ادائیگی نہ ہونا ایک سنجیدہ مسئلہ ہے اور حکومت اس معاملے کو ہمیشہ کے لئے حل کرنے کے لئے تمام تر وسائل بروئے کار لا ئے گی۔