موسمی ایڈوائزری میں لینڈ سلائیڈنگ اور پتھرگرنے کا امکان
بلال فرقانی
سرینگر// محکمہ موسمیات سرینگر نے جموں و کشمیر کیلئے ایک ایڈوائزری جاری کی ہے، جس میں آنے والے دنوں میں بھاری سے بہت زیادہ بارش، اچانک سیلاب اور لینڈ سلائیڈنگ کے خطرات کی وارننگ دی گئی ہے۔تاہم حکام نے سیلاب کے کسی بھی امکان کو رد کردیا ہے۔جموں و کشمیر میں گزشتہ دو دنوں سے بارش ہو رہی ہے، جس سے حالیہ شدید گرمی کی لہر سے بہت زیادہ راحت ملی ہے۔دریں اثناء سرکاری اعداد و شمار کے مطابق، جموں و کشمیر کے مختلف حصوں میں گزشتہ 24 گھنٹوں کے دوران بارش ہوئی۔ پہلگام میں 16.6 ملی میٹر، کولگام (17.2 ملی میٹر)، گلمرگ (15.2 ملی میٹر) اور اونتی پورہ (12.0 ملی میٹر)ریکارڈ کی گئی۔ دیگر مقامات میں ٹنگمرگ میں (12.2 ملی میٹر)، کوکرناگ (10.8 ملی میٹر)، نوگام ہندواڑہ (10.8 ملی میٹر)، قاضی گنڈ (9.5 ملی میٹر)، چرار شریف (8.2 ملی میٹر)اور سونمرگ (8.5 ملی میٹر)شامل ہیں۔سری نگر شہر میں 4.3 ملی میٹر جبکہ پلوامہ اور کپوارہ میں بالترتیب 6.0 ملی میٹر اور 5.0 ملی میٹر ، سوپور (2.4 ملی میٹر)، بانڈی پورہ (1.0 ملی میٹر)اور شوپیان (0.5 ملی میٹر)میں بھی ہلکی بارش ہوئی۔جموں ریجن میں ادھم پور میں سب سے زیادہ بارش 43.0 ملی میٹر ریکارڈ کی گئی، اس کے بعد کٹرا (35.8 ملی میٹر)، ریاسی (25.0 ملی میٹر)اور راجوری (23.0 ملی میٹر)میں بارش ہوئی۔ جموں شہر 15.9 ملی میٹر، پونچھ میں 12.0 ملی میٹر، جبکہ بانہال، بٹوٹ اور رام بن میں 3-5 ملی میٹر کے درمیان بارش ہوئی۔ کٹھوعہ میں اس دوران کوئی بارش ریکارڈ نہیں ہوئی۔لداخ کے علاقے میں گزشتہ 24 گھنٹوں میں لیہہ میں 2.6 ملی میٹر اور کرگل میں 0.5 ملی میٹر بارش ہوئی۔ڈائریکٹر موسمیات ڈاکٹر مختار احمد نے کہا کہ 16-17 جولائی اور 21-23 جولائی تک موسم عام طور پر ابر آلود رہنے کی توقع ہے۔ اس دوران مرکز کے زیر انتظام علاقوں کے کئی حصوں میں وقفے وقفے سے ہلکی سے درمیانی اورگرج چمک کے ساتھ بارشیں ہوں گی۔ڈاکٹر مختار نے کہا کہ “ان ادوار کے دوران شدید بارش اور شدید سے بہت زیادہ بارشوں کے الگ تھلگ واقعات کا امکان ہے۔”انہوں نے مزید کہا کہ 18 سے 20 جولائی تک بکھرے ہوئے علاقوں میں ہلکی سے درمیانی/گرج چمک کے ساتھ بارش کی بھی توقع ہے۔محکمہ کی طرف سے جاری ایڈوائزری میں کہا گیا ہے کہ 16-17 جولائی اور 21-23 جولائی کے دوران کچھ مقامات پر شدید بارش کا امکان ہے۔ ایڈوائزری میں خطرناک مقامات پر ممکنہ سیلاب کے ساتھ ساتھ پہاڑی علاقوں اور بڑی شاہراہوں پر لینڈ سلائیڈنگ، مٹی کے تودے اور پتھرگرنے سے بھی خبردار کیا گیا ہے۔رہائشیوں بالخصوص سیلاب زدہ اور لینڈ سلائیڈنگ کے شکار علاقوں میں رہنے والوں کو چوکس رہنے اور غیر ضروری سفر سے گریز کرنے کا مشورہ دیا گیا ہے۔ حکام پر زور دیا گیا ہے کہ وہ چوکس رہیں اور خلل کو روکنے اور عوام کی حفاظت کو یقینی بنانے کے لیے ضروری احتیاطی تدابیر اختیار کریں۔
