اڑی رابطہ سڑک کی خستہ حالی پر مقامی لوگ برہم سڑک بارش میں تالاب جیسی شکل اختیار کر گئی ،توجہ کی مانگ

جاوید اقبال
مینڈھر //سب ڈویژن مینڈھرکے اڑی علاقہ سے تعلق رکھنے والے لوگوں نے محکمہ تعمیرات عامہ (PWD) کے اعلیٰ افسران کو شدید تنقید کا نشانہ بناتے ہوئے کہا کہ علاقہ کی سڑک کی حالت نہایت ہی خستہ ہو چکی ہے۔مقامی لوگوں کے مطابق سڑک پر جگہ جگہ بڑے بڑے کھڈے پڑے ہوئے ہیں جن سے نہ صرف ٹریفک کی روانی متاثر ہو رہی ہے بلکہ روزمرہ سفر کرنے والے لوگوں کو شدید مشکلات کا سامنا کرنا پڑ رہا ہے۔عوام کا کہنا ہے کہ اس سڑک سے روزانہ سینکڑوں گاڑیاں گزرتی ہیں جن میں اسکولی بچے، مریض، اور دفتری ملازمین شامل ہوتے ہیں، لیکن سڑک کی خستہ حالی کے سبب ہر کسی کو پریشانی جھیلنی پڑتی ہے۔ایک مقامی شہری نے کہاکہ ’’محکمہ صرف کاغذوں میں کام دکھاتا ہے، زمینی سطح پر کوئی عملی قدم نہیں اٹھایا جاتا ہم کئی بار افسران کو تحریری شکایات دے چکے ہیں، لیکن کوئی سنوائی نہیں ہوئی‘‘۔عوامی نمائندوں سے بھی مطالبہ کیا گیا کہ وہ اس مسئلے کو سنجیدگی سے لیں اور جلد از جلد سڑک کی مرمت کیلئے اقدامات کریں۔مقامی لوگوں نے خبردار کیا ہے کہ اگر محکمہ نے جلد سڑک کی مرمت نہ کی تو وہ احتجاج کا راستہ اختیار کریں گے۔