عظمیٰ نیوز سروس
سرینگر//اپنی پارٹی کے سربراہ الطاف بخاری نے سرینگر کے اچھن علاقے میں واقع ڈمپنگ گرائونڈ سے پیدا ہونے والی عفونت پر اپنی تشویش کا اظہار کرتے ہوئے کہا کہ بڑھتے ہوئے درجہ حرارت کی وجہ سے بدبو میں مزید اضافہ ہوگیا ہے اور مقامی باشندگان کا جینا دوبھر ہوگیا ہے۔اپنی پارٹی کے سربراہ نے حکومت پر زور دیا کہ وہ کوڑے کرکٹ کو ٹھکانے لگانے کیلئے جدید طرز پر اور سائنٹفک اصولوں کے مطابق منصوبہ شروع کرے اور فی الحال ہنگامی طور پر اچھن سائٹ پر جراثیم کش ادویات کا فوری چھڑکاؤ کرائے تاکہ اس سے اٹھنے والے عفونت کو قابو کیا جاسکے اور انسانی صحت پر اس کے اثرات کو زائل کیا جاسکے۔اپنے ایک بیان میں سید محمد الطاف بخاری نے کہا کہ ’’اچھن کے مقامی باشندوں نے مجھے مطلع کیا ہے کہ بڑھتے ہوئے درجہ حرارت کے ساتھ ڈمپنگ سائٹ سے ناقابل برداشت بدبو پھیل رہی ہے جس سے ان اور آس پاس کے علاقوں میں رہنے والوں کی زندگی اجیرن ہو رہی ہے، اس سے بھی بڑھ کر تشویشناک بات یہ ہے کہ متعلقہ محکمہ اس ڈمپنگ سائٹ پر جراثیم کش ادویات کے چھڑکاؤ کرنے کی زحمت بھی نہیں کرتا ہے‘‘۔انہوں نے وزیر اعلیٰ عمر عبداللہ سے اس مسئلے کو حل کرانے کیلئے ذاتی طور پر مداخلت کرنے کا مطالبہ کیا۔ انہوں نے کہا ’’چونکہ وزیر اعلیٰ کے پاس شہری ترقی کا قلمدان بھی ہے، اس لیے اس مسئلے کو حل کرنا ان کی ذاتی ذمہ داری ہے۔ میں پْرزور مطالبہ کرتا ہوں کہ ایک سرینگر میں کوڑے کرکٹ کو ٹھکانے لگانے کیلئے سائنٹفک اصولوں کے مطابق جدید طرز کا منصوبہ شروع کیا جائے اور فی الحال اچھن سائٹ پر جراثیم کش ادویات کا سپرے کرایا جائے۔‘‘انہوں نے مزید کہا، ’’چونکہ اچین ڈمپنگ سائٹ سکمز کے قریب واقع ہے، اور نہ صرف مقامی آبادی بلکہ قریبی علاقوں میں رہنے والے بھی اس سائٹ سے پیدا شدہ بدبو سے متاثر ہوتے ہیں، اسلئے اس مسئلے کا فوری حل نکالنا ناگزیر ہے۔ یہ بات ثابت ہو چکی ہے کہ کوڑا کرکٹ کے اس ڈھیر سے انسانی صحت کو بہت زیادہ خطرات لاحق ہیں۔ یہاں سے میتھین گیس کا اخراج بھی ہوتا ہے اور زیر زمین پانی بھی ا?لودہ ہورہا ہے۔ کوڑے کرکٹ کے اس ڈھیر کی وجہ سے ماحولیات پر انتہائی برا اثر مرتب ہورہا ہے۔ چونکہ عید قریب ا?رہی ہے اور اس لئے اس مسئلے کا تدارک کرنے کیلئے فوری اقدامات کرنے کی ضرورت ہے‘‘۔
