نئی دہلی // پارلیمنٹ کے مون سون اجلاس میں اپوزیشن کے سخت رویہ کے جواب میں وزیر اعظم نریندر مودی نے منگل کو کہا کہ اپوزیشن کورونا وبا میں حکومت کی کامیابی سے مایوس ہے اور اسی وجہ سے وہ بحث سے دور بھاگ رہی ہے۔
مودی نے یہ باتیں بھارتیہ جنتا پارٹی (بی جے پی) پارلیمانی پارٹی کے اجلاس سے خطاب کرتے ہوئے کہیں۔
پارلیمانی امور کے وزیر پرہلاد جوشی نے صحافیوں کو بتایا کہ اجلاس میں وزیر اعظم نے کہا ” کووڈ وبائی بیماری ہمارے لئے سیاسی مسئلہ نہیں ہے بلکہ ایک انسانی مسئلہ ہے۔ گزشتہ ایک صدی میں ایسا پہلی مرتبہ ہوا ہے جب آبادی کے ایک بڑے حصے کو اناج دیا گیا ۔ ہم نے یہ کام احسان کے جذبے سے نہیں بلکہ فرض سمجھ کر کیا ہے“۔
جوشی نے کہا کہ اجلاس میں وزیر اعظم نے اپوزیشن کے موقف پر گہری تشویش کا اظہار کیا اور کہا ” اپوزیشن پارلیمنٹ میں لوگوں کے مسائل نہیں اٹھانے دے رہی ہے۔ کانگریس کا خیال ہے کہ اقتدار اور وزیر اعظم کا عہدہ ان کا حق ہے اور وہ اسی جذبے سے کام کر رہی ہے۔ حکومت یہ چاہتی ہے کہ ایوان میں بامعنی گفتگو ہو۔ گزشتہ دو سالوں سے ملک کو وبائی بیماری کا سامنا ہے۔ لیکن حزب اختلاف کا طرز عمل بہت غیر ذمہ دارانہ ہے“۔
