عظمیٰ نیوز سروس
نئی دہلی// حکومت نے پیر کو لوک سبھا میں آپریشن سندور اور پہلگام ملی ٹینٹ حملے پر 16 گھنٹے کی بحث پر اتفاق کیا، اور امکان ہے کہ اسے اگلے ہفتے کیا جائے گا۔ اپوزیشن نے اصرار کیا کہ اسے اس ہفتے ہی شروع کیا جائے اور وزیر اعظم نریندر مودی کو جواب دینا چاہیے۔بزنس ایڈوائزری کمیٹی کی میٹنگ میں حکومتی نمائندوں نے نوٹ کیا کہ پی ایم مودی اس ہفتے غیر ملکی دورے پر روانہ ہو رہے ہیں، اور جب وہ ایوان میں موجود ہوں گے تو بحث اگلے ہفتے ہی ممکن ہو سکتی ہے۔اپوزیشن ارکان نے احتجاج کیا کہ حکومت کے اس ہفتے کے ایجنڈے میں اس معاملے پر بحث کے مطالبے کا ذکر نہیں ہے۔ان کا کہنا تھا کہ وزیر داخلہ اور وزیر دفاع بھی موجود ہوں۔سنگھ نے کہا، ” اپوزیشن چاہے کسی بھی موضوع پر حکومت بات کرنے کے لیے تیار ہے، انہیں جس وقت بھی بات کرنے کی ضرورت ہو، حکومت تمام سوالوں کے جواب دینے کے لیے تیار ہے،” ۔پارلیمانی امور کے وزیر کرن رجیجو نے ایوان میں کہا، “حکومت ان تمام مسائل کا جواب دینے کے لیے تیار ہے جن پر سپیکر بی اے سی میٹنگ میں متفق ہیں۔ لیکن مانسون اجلاس کے پہلے دن نعرے لگانا اور ایوان کو کام کرنے نہ دینا ناقابل قبول ہے۔”جب اپوزیشن ارکان نے ویل میں احتجاج جاری رکھا تو کرسی میں موجود جگدمبیکا پال نے انہیں اپنی نشستوں پر واپس آنے کو کہا اور انہیں یقین دلایا کہ سپیکر اوم برلا انہیں ان تمام معاملات کو اٹھانے کی اجازت دیں گے جن پر وہ بحث کرنا چاہتے ہیں۔اپوزیشن لیڈروں کے باز نہ آنے پر پال نے کہا، “میں قائد حزب اختلاف سے اپیل کرتا ہوں، راہول گاندھی سے اپیل کرتا ہوں کہ وہ ایوان کو زیرو آور شروع کرنے دیں۔ ملک کے لوگ کارروائی کو دیکھ رہے ہیں اور دیکھ رہے ہیں کہ حکومت تمام مسائل پر بحث کرنے کے لیے تیار ہے، لیکن اپوزیشن نہیں چاہتی کہ ایوان کام کرے۔”
اپوزیشن کا شور شرابہ
اپوزیشن کے شور شرابے کے درمیان لوک سبھا کی کارروائی پیر کو دن بھر کے لیے ملتوی کر دی گئی، اپوزیشن آپریشن سندور، پہلگام حملہ اور دیگر مسائل پر بحث کا مطالبہ کررہی تھی۔ایک ماہ تک جاری رہنے والے مانسون اجلاس کے پہلے دن یہ چوتھا التوا تھا۔جیسے ہی تیسرے التوا کے بعد سہ پہر 4 بجے ایوان دوبارہ شروع ہوا تو، ارکان پر زور دیا گیاکہ وہ گوا اسمبلی کی سیٹوں کی از سر نو ترتیب سے متعلق بل کو اٹھانے کی اجازت دیں۔تاہم، اپوزیشن نے آپریشن سندور پر بحث کے اپنے مطالبے پر نعرے بازی جاری رکھی۔اس سے قبل جب ایوان کا اجلاس دوسرے التوا کے بعد دوپہر 2 بجے ہوا تو چیئر نے اپوزیشن ارکان سے اپیل کی کہ وہ ایوان کو چلنے دیں۔ مسلسل نعرے بازی کے درمیان کارروائی 4 بجے تک ملتوی کر دی گئی۔گزشتہ روز انہی مسائل پر ایوان کی کارروائی ملتوی کر دی گئی تھی۔وزیر دفاع راج ناتھ سنگھ نے حزب اختلاف کے اراکین پارلیمنٹ کو یقین دلایا کہ حکومت ان تمام مسائل پر طویل بحث کے لیے تیار ہے جن پر سپیکر متفق ہیں۔جب صبح 11 بجے لوک سبھا کا اجلاس ہوا، تو تعزیت کے حوالہ جات کے بعد، کانگریس کی قیادت میں اپوزیشن کے ارکان کھڑے ہوگئے اور آپریشن سندور پر بحث پر اصرار کیا۔برلا نے کہا کہ وہ اراکین کو سوالات کے گھنٹے کے بعد آپریشن سندور سمیت تمام مسائل اٹھانے کی اجازت دینے کے لیے تیار ہیں۔انہوں نے کہا کہ میں آپ کو سوالات کے وقفے کے بعد تمام مسائل اٹھانے کی اجازت دوں گا۔ ایوان قواعد و ضوابط کے مطابق چلے گا،میں نعرے لگانے اور پلے کارڈ اٹھانے کی اجازت نہیں دے سکتا۔برلا نے کہا کہ اگر ممبران نوٹس دیتے ہیں تو وہ انہیں تمام مسائل اٹھانے کی اجازت دیں گے اور ہر ممبر پارلیمنٹ کو کافی وقت دیں گے۔انہوں نے کہا کہ “محترم اراکین، یہ سوال کا وقت ہے، ہمیں اعلی پارلیمانی معیار کو برقرار رکھنے کی کوشش کرنی چاہیے، ہمیں ان لوگوں کی امیدوں اور توقعات پر پورا اترنے کی کوشش کرنی چاہیے جنہوں نے ہمیں منتخب کیا ہے اور ملک کے اہم مسائل پر بحث و مباحثہ کرنا چاہیے۔”انہوں نے کہا کہ نعرے لگانے کے لیے ایوان کے باہر جائیں۔انہوں نے کہا کہ آپ آپریشن سندور پر بحث چاہتے ہیں، میں وقفہ سوالات کے بعد اس کی اجازت دوں گا، حکومت تمام مسائل کا جواب دینے کے لیے تیار ہے۔
لوک سبھا کاملی ٹینسی کے خلاف زیرو ٹالرنس کے عزم کا اظہار
نئی دہلی/عظمیٰ نیوز سروس/لوک سبھا نے پیر کو ملی ٹینسی کے خلاف صفر رواداری کے اپنے عزم کا اظہار کیا اور پہلگام حملے میں 26 لوگوں کی موت پر سوگ کا اظہار کیا۔لوک سبھا سپیکر اوم برلا نے پیر سے شروع ہونے والے لوک سبھا کے مانسون اجلاس کے بلائے جانے کے دوران کہا”22 اپریل 2025 کو جموں اور کشمیر کے پہلگام میں ملی ٹینٹ حملے میں چھبیس بے گناہ لوگ بے دردی سے مارے گئے تھے اورملی ٹینسی کی یہ کارروائی قوم اور پوری دنیا کے شعور پر حملہ تھا‘‘۔انہوں نے کہا کہ یہ ایوان اس حملے میں ہونے والی ہلاکتوں پر گہرے رنج و غم کا اظہار کرتا ہے اور ملی ٹینسی کے خلاف ہندوستان کے زیرو ٹالرنس کے عزم کا اعادہ کرتا ہے۔انہوں نے مزید کہا کہ “یہ ایوان ائر انڈیا حادثے کے متاثرین کے اہل خانہ سے بھی دلی ہمدردی کا اظہار کرتا ہے”۔
