اشتیاق ملک
ڈوڈہ //ڈوڈہ پولیس کی سائبر کرائم انویسٹی گیشن یونٹ نے آن لائن دھوکہ دہی معاملات کا نپٹارا کرتے ہوئے 8لاکھ سے زائد نقد رقم و 8 لاکھ روپے کی مالیت کے گمشدہ 43موبائل فونز یوٹی و ملک کی دیگر ریاستوں سے برآمد کرکے اصل مالکان کے سپرد کئے ہیں۔ضلع پولیس کی جانب سے جاری تفصیلات کے مطابق ایس ایس پی ڈوڈہ سندیپ کمار مہتا کی نگرانی میں پی ایس آئی انکو ناگرا قیادت میں سائبر کرائم یونٹ نے کامیابی سے آن لائن دھوکہ دہی کی رقم 8,39,004روپے برآمد کی ہے اور 43گمشدہ موبائل فونز جن کی تخمینی قیمت تقریباً 8,00,026روپے ہے، ملک کے اندر اور مختلف ریاستوں ویونین ٹیریٹریز سے تلاش کرکے برآمد کی۔پولیس کے مطابق یونٹ کو مختلف شکایات کنندگان سے آن لائن مالیاتی فراڈ اور موبائل گمشدگی ہونے کی شکایات موصول ہوئی تھیں۔تفتیش کے دوران ٹیم نے تمام وسائل کو بروئے کار لاتے ہوئے جدید تکنیکی مہارتیں دکھائیں جس کے نتیجے میں 8,39,004روپے کی دھوکہ دہی کی رقم کامیابی سے برآمد ہوئی اور اس کے علاوہ 43گمشدہ موبائل فونز بھی برآمد ہوئے جن کی تخمینی قیمت تقریباً 8,00,026روپے ہے۔ایس ایس پی ڈوڈہ سندیپ کمار مہتا نے ضلع پولیس ہیڈکوارٹر ڈوڈہ میں برآمد شدہ موبائل فونز ان کے حقیقی مالکان کے حوالے کیے. ایس ایس پی نے عام لوگوں سے اپیل کی کہ وہ اپنے موبائل فونز کا انتہائی خیال رکھیں کیونکہ ان میں ذاتی مواد ہوتا ہے اور موبائل فونز کے غلط استعمال کا پورا امکان ہوتا ہے۔اپنے گمشدہ موبائل فونز واپس ملنے پر مالکان نے خوشی کا اظہار کرتے ہوئے ضلع پولیس کی کوششوں پر ان کا شکریہ ادا کیا۔ ایس ایس پی ڈوڈہ سندیپ مہتا نے اپنی اپیل میں عام لوگوں سے ایک بار پھر کہا کہ وہ انتہائی محتاط رہیں اور فوری طور پر نیشنل ہیلپ لائن نمبر 1930 پر رپورٹ کریں یا www.cybercrime.gov.in پر آن لائن سائبر شکایات درج کریں اور گمشدہ یا چوری شدہ موبائل کی صورت میں www.ceir.gov.in پر رپورٹ کریں۔
