آفات سماوی اور موسم کی بروقت درست پیشگوئی

سرینگر//جموں وکشمیر میں آفات سماوی اورموسم کی غیر یقینی صورتحال سے متعلق پیش گوئیوں کے نظام کو بہتربنانے کیلئے محکمہ موسمیات کا  اگلے 3برسوں میںنئے راڈار نصب کرنے اور موسمی سٹیشن قائم کرنے کا منصوبہ ہے جس کے لئے ریاستی حکومت سے اراضی دینے کیلئے رجوع کیا گیا ہے۔اس اہم منصوبے کے حوالے سے ورلڈ بنک سے بھی مدد لی جارہی ہے۔جموں وکشمیر میں محکمہ موسمیات کے پاس کل 13 منیول رسدگاہیں ہیں جن میںسے10فعال ہیں جبکہ ضلع بارہمولہ کے سیاحتی مقام گلمرگ کا سیزنل سٹیشن 1990سے اورایچ ایم او رام بن 2002سے بے کارپڑے ہیںاور میٹ آفس لہیہ زیر تعمیرہے ۔ذرائع کا کہنا ہے کہ محکمہ موسمیات امرناتھ یاترا کے دوران یاتریوں کو موسم کی بروقت جانکاری دینے کے لئے پہلگام اور بال تل میں 4جز وقتی سٹیشنوںکا قیام بھی عمل میں لارہاہے ۔ جموں وکشمیر میں کل 15 خودکار موسمی سٹیشن کام کرتے ہیں جبکہ جموں وکشمیرمحکمہ موسمیات نے محکمہ موسمیات ہند کو مزید12 خودکار موسمی اسٹیشن قائم کرنے کا منصوبہ پیش کیا ہے ۔کشمیر عظمیٰ کے پاس دستیاب دستا ویزات کے مطابق محکمہ موسمیات ہند جموں وکشمیر کے حساس موسمی علاقوں میں مربوط ہمالین موسمی پروگرام کے تحت جدید طرز پر بنائے گئے موسمی آلات اور راڈارنصب کر رہا ہے جو مالی سال 2017سے2020کے درمیاں مکمل ہو جائیں گے ۔ یہ اضافی خودکار موسمی سٹیشن اورجدید ٹیکنالوجی سے لیس راڈار قبل از وقت ہی سو فیصد درستگی کے ساتھ موسمی صورتحال کی جانکاری فراہم کریں گے ۔دستاویزات کے مطابق2جدید ڈاپلرموسمی راڈار نصب کرنے کا منصوبہ ہے جن میںسے ایک لیہہ اور ایک جموں میں نصب کیا جائے گا جبکہ سرینگر کے علاقائی موسمی دفتر پر پہلے ہی یہ راڈار نصب کیا جاچکاہے ۔اس کے علاوہ 30خودکاربرساتی گیج،22خودکاربرفانی گیج،5 خود برساتی راڈاروں کے ساتھ ساتھ محکمہ موسمیات4 جدیدموسمی آلات بھی نصب کرنے جارہا ہے ۔ذرائع کا کہنا ہے کہ محکمہ موسمیات نے مختلف موسمی آلات نصب کرنے کے لئے زمین کی حصولی کیلئے ریاستی حکومت سے رجوع کیا ہے جبکہ تمام بڑے دریائوں کے کناروں پرخودکار برساتی گیجوں و خودکار موسمی اسٹیشنوں کی تنصیب کیلئے بھی حکومت سے تعاون مانگا ہے۔ذرائع کا کہنا ہے کہ اس ضمن میں عالمی بنک سے مالی معاونت حاصل کرنے کیلئے منصوبہ تیار کیاگیا ہے جبکہ محکمہ موسمیات نے موسم سرما و موسم گرما کے آغاز سے قبل ڈیزاسٹر منیجمنٹ سے وابستہ تمام متعلقین کی کم از کم ایک میٹنگ کرنے کی بھی سفارش کی ہے۔اس حوالے سے محکمہ موسمیات سرینگر کے ڈپٹی ڈائریکٹر ڈاکٹر مختار احمد نے کشمیرعظمیٰ کو بتایا کہ ا نڈین میٹرولاجیکل ڈیپارٹمنٹ نے جموں وکشمیر میں قدرتی آفات سے نمٹنے کے لئے جدید طرز کے موسمی آلات کے علاوہ نئے خود کار موسمی اسٹیشن کھولنے کا منصوبہ تیار کیا ہے جو2020تک مکمل ہونے کی توقع ہے ۔