آغا حسن سے این آئی اے کی طویل پوچھ تاچھ

 سرینگر// قومی تحقیقاتی ایجنسی این آئی اے  نے جمعہ کو کئی گھنٹوں تک سنیئر مزاحمتی لیڈر آغا سید حسن سے پوچھ تاچھ کی،جس کے دوران بڈگام قصبے میں مکمل ہڑتال رہی۔ این آئی اے نے آغا سید حسن کو ہمہامہ میں حاضر ہونے کی ہدایت دی تھی۔جمعہ کی صبح آغا حسن این آئی اے آفس ہمہامہ پہنچے، جہاں ان سے کئی گھنٹوں تک پوچھ تاچھ کی گئی۔ پوچھ تاچھ کے بعد قریب12 بجے انہیں واپس جانے کی اجازت دی گئی۔اس دوران بڈگام قصبے اور کچھ دیگر علاقوں میں احتجاج کے طور پر ہڑتال رہی۔ انجمن شرعی شعیان کے مطابق بڈگام، ماگام، زڈی بل، سمبل اندرکوٹ سعدہ کدل میں ہڑتال رہی۔ دریں اثناء این آئی اے کی درخواست پر دلی کی خصوصی عدالت نے لشکر طیبہ سربراہ حافظ محمد سعید اور حزب المجاہدین سربراہ سید صلاح الدین کے خلاف جموں و کشمیر میں دہشت گرد انہ فنڈنگ کے معاملے میں غیر ضمانتی وارنٹ جاری کئے ۔این آئی اے کے ترجمان کے مطابق پٹیالہ ہاؤس میں واقع خصوصی  عدالت نے جمعرات کو ان دونوں کے خلاف غیر ضمانتی وارنٹ جاری کئے۔ان دونوں کے خلاف تعزیرات ہند کی دفعات 120 بی، 121 اور 121 اے اور غیر قانونی سرگرمی روک تھام   ایکٹ 1967 کی دفعہ 13، 16،17،18،20، 38، 39 اور 40 کے تحت الزامات دائر کئے گئے ہیں۔ این آئی اے نے اس معاملے میں ان دونوں کے ساتھ 12 لوگوں کے خلاف گزشتہ جنوری میں چارج شیٹ دائر کی تھی۔