آسٹریلیا میں ٹیم انڈیا کے اوپن ٹریننگ سیشن پرپابندی!

سڈنی /ٹیم انڈیا کے اوپن ٹریننگ سیشن پر پابندی لگا دی گئی۔میڈیا رپورٹ کے مطابق اوپن ٹریننگ سیشن پر پابندی پوری آسٹریلیا سیریز کے لیے لگائی گئی ہے۔دوسرے ٹیسٹ میچ سے قبل ایڈیلیڈ میں بھارتی ٹیم کے ٹریننگ سیشن کو دیکھنے کے لیے 5 ہزار سے زائد شائقین آ گئے تھے، اس دوران بڑی تعداد میں شائقین ٹریننگ کے دوران ویرات کوہلی سمیت اپنے پسندیدہ اسٹارز کے حق میں اونچی اونچی آوازیں لگاتے رہے۔اوپن ٹریننگ سیشن میں کھلاڑیوں نے غیر آرام دہ محسوس کیا۔اس دوران سیلفیز کی کوشش سے بھی کرکٹرز پریشان ہوئے۔واضح رہے کہ ایم سی جی میں نیٹس باہر ہونے کی وجہ سے ٹریننگ اوپن ہوتی ہے اور آسٹریلیا میں ٹریننگ سیشنز کے دوران شائقین کی آمد ایک روایت بھی ہے اس معاملے پر کرکٹ آسٹریلیا کے ترجمان نے کہا کہ بھارت نے اپنے باقی ٹریننگ سیشن اوپن نہ رکھنے کی ترجیح بتائی ہے۔میڈیا رپورٹس کے مطابق ٹیم کے ٹریننگ سیشنز کے دوران میڈیا کو کوریج کی اجازت ہو گی۔کے ایل راہول نے اوپن ٹریننگ سیشن کے معاملے پر کہا ہے کہ یہ مختلف ہے، ہمیں اس چیز کی عادت نہیں ہے، ہوم گراؤنڈز پر عوام کی موجودگی میں پریکٹس زیادہ تر ٹی ٹوئنٹی اور ون ڈے کرکٹ میں کی ہے۔یاد رہے کہ بھارت اور آسٹریلیا کے درمیان 5 ٹیسٹ میچز کی سیریز میں بھارت کو ایک صفر سے برتری حاصل ہے۔