روزانہ کی طرح آج بھی جب میں سبزی منڈی کے نکڑسے گزر رہا تھا تو اچانک ایک آواز میرے کانوں سے ٹکرائی۔۔۔مانو کوئی بہت بڑا حادثہ ہوگیا ہو۔میں نے پلٹ کر دیکھا۔۔۔تو مظفر صاحب ہاتھوں میں ٹوکری لیے مجھے آواز دے رہے تھے۔میرے بڑھتے ہوئے قدم رک گئے اور منہ پھیر کر ان کی طرف پلٹ ہی رہا تھا کہ ایک لڑکا موٹر سائکل پر سوار میرے قریب سے ایسے گزرا کہ میں گھبرا کر دوقدم پیچھے ہٹ گیا۔موٹر سائکل کے شور اور زنا ٹے دار آواز سے میں اتنا بدحواس ہوا کہ ہاتھوں میںجھول رہا تھیلا دور جاگرا۔ابھی میں اپنے حواس پوری طرح سے یکجا بھی نہ کرپا یا تھا کہ پھر سے مظفر صاحب کی آواز فضا میں گونج اٹھی۔
’’نور چچا ہم نے سنا ہے کہ اب آپ ریٹا ئرڈ ہوگئے‘‘۔چلو اچھاہوگیا ۔روز روز جھنجھٹ سے چھٹی مل گئی۔مگر اب ہمارا ایک مشورہ ہے اب آپ گھر پر ہی آرام کیجئے گا۔بازار آنا جانا دوسروں کے لیے چھوڑ دیجئے گا۔ابھی کل کی ہی بات ہے۔وہ عزیز کا کا ہیں نا،کل بھیڑ میں کسی نے ان کا بٹوہ مار دیا ۔بے چارے دو گھنٹے اِدھر سے ادھر پریشان پھرتے رہے مگر کچھ نہ ہو ا۔آپ بھی ذرا ہوشیار رہئے گا۔مجھے اس کی باتیں تیر کی طرح چبھنے لگیں۔مظفر صاحب کا ایک ایک جملہ ہتھوڑا بن کر میرے دل و دماغ پر ضربیں لگا رہا تھا۔اب تک تو میں لوگوں کو صلاح دیا کرتا تھا مگر اب لوگ مجھے مشورہ دینے لگے ہیں۔ویسے اتنے طویل عرصے میں میرا کبھی کوئی نقصان تو ہوا نہیں۔پھر اب یہ اس طرح کی باتیں کیوں سامنے آنے لگی ہیں۔میں نے بے زاری سے جواب دیتے ہوئے کہا۔ہاںبھئی ذرا سنبھل کر رہنا ہو گا۔
میں سوچنے لگا مجھے ریٹائر ڈ ہوئے ابھی ہفتہ بھر بھی نہیں ہوا ہے۔لوگوں کو کیوں ایسی پریشانی لاحق ہوئی ہے ۔خیالات کی اس تگ ودو میں،میں نے آدھا ادھورا سودا خریدا اور گھر کی طرف چلا آیا۔آنگن میں داخل ہوتے ہی کان میں بہو کی آواز گونجی۔۔۔۔وہ شکایت آمیز لہجے میں کہہ رہی تھی۔۔۔’’ماں
جی دوپہر ہونے کو آئی ہے ۔چاچا جی صبح سے بازار گئے ہیں۔کھانا کب تیار ہوگا؟ہادی اب سکول سے آتا ہی ہوگا۔آتے ہی کھانا مانگے گا۔‘‘
ارے بہو۔۔۔ان کا کیا۔۔اب تو وہ بے فکر ہوگئے ہیں۔بیٹھے ہوں گے کسی کے ساتھ گپیں ہانکنے ۔۔۔بیوی نے اس کی حمایت میں بولتے ہوئے کہا۔۔۔
ان کی اس طرح کی باتیں سن کر میری پہلے سے سست ہوئی رفتار مزید دھمیی ہوگئی۔میں نے آہستہ آہستہ سے دروازہ کھولا اور جھولا ایک طرف رکھ کرکمرے میں چلا آیا۔مجھے نہیں معلوم کیوں اور کیسے بازار تک آنے جانے میں آج میلوں چلنے کا احساس ہونے لگا تھا۔میری سمجھ میں کچھ نہیں آرہا تھا کہ کیا کروں۔کمرے کی چار دیواری میں عجیب طرح کی گھٹن کا احساس ہونے لگاتھا۔حالانکہ یہی وہ کمرہ تھا جب میں آفس سے تھکا ماند لوٹتا تھا تو یہاں ہر پل راحت کا احساس ہوتا تھا۔یہاں بیٹھ کر اور آرام کرکے میں دنیا و ما فیہا سے بے خبر ہوجایا کرتا تھا۔مگر آج معلوم نہیں کیوں مجھے بے چینی سی محسوس ہو رہی تھی۔کھڑکی سے پڑوس کے بچوں کے شور سے تلاطم پیدا ہو رہا تھا۔پھر یکا یک خیال آیا۔۔۔پچھلے ہفتے تک تو سب کچھ ٹھیک ٹھاک تھا۔آفس سے آتے ہی بہو ٹیبل پر چائے رکھ جاتی تھی۔بیوی قریب آکر دیکھتی تھی۔
مانو وہ ان کہے مجھ سے پوچھتی کہ کسی چیز کی ضرورت تو نہیں۔۔۔مگر آج ماحول میں اچانک یہ تبدیلی کیسے آگئی۔مجھے بازار سے آنے میں دیر کیا ہوئی جیسے کوئی پہاڑ ٹوٹ پڑا ہو۔
میں سوچ کی وادیوں میں الجھتا گیا۔اور پھر بہت دور کسی اور دنیا میں کھوگیا۔میں ماضی کے خوابوں میں غرق ہونا چاہتا تھا۔ میری سمجھ میں کچھ نہیں آرہا تھا۔میں بت بن کر یہ سب کچھ دیکھ رہا تھا کہ اچانک بیوی کے چلانے سے چونک پڑا اور ادھر سارا منظر درہم برہم ہوگیا اور میں ہربڑا کر اٹھ بیٹھا۔بیوی بہ آواز بلند بہو سے کہہ رہی تھیں کہ جب سے یہ ریٹائرڈ ہوئے ہیں دن اور رات انہیں سونے کے سوا دوسرا کوئی کا م نہیں ہے۔میں نے لاکھ سمجھایاکہ پڑوس کے رشید میاں کی طرح ریٹائر منٹ کے بعد دوسرا کوئی کا م کیوں نہیں دیکھ لیتے۔مگر میری سنتا کون ہے۔۔۔؟بیوی کی آواز مجھے میلوں دور سے آتی ہوئی لگ رہی تھی ۔بستر پر نیم درازی کی حالت میں پڑا،میں سوچ رہاتھا اگر زندگی کے آخری سفر تک کام ہی کام کرنا ہے تو لوگ ریٹائرڈ ہی کیوں ہوتے ہیں؟
رعناواری سرینگر،رابطہ؛9697330636
