بلال فرقانی
سرینگر// جموں کشمیر میںآ ج یوم عاشورہ کی مناسبت سے وادی بھر میںذوالجناح اور علم شریف کی تقریبات کا انعقاد کیا جارہا ہے۔ ذوالجناح کے سب سے بڑے جلوس جڈی بل سرینگر اور بڈگام میں نکالے جارہے ہیں جہاں علم شریف کے جلوسوں میں ہزاروں لوگ شامل ہوکر مرثیہ خوانی کریں گے۔اس طرح کی تقریبات ہر سال یوم عاشورہ کی روایت رہی ہیں۔تاہم ضلع انتظامیہ سرینگر نے پہلے ہی اس بات کی وضاحت کی ہے کہ امسال بھی سابقہ برسوں کی طرح آبی گذر سے جڈی بل تک روایتی جلوس نکالنے کی اجازت نہیں ہوگی۔ 8ویں محرم الحرام کے موقعہ پر بھی گوروبازار سے بچھوارہ ڈلگیٹ تک روایتی جلوس نکالنے کی اجازت نہیں دی گئی اور شہر کے 8پولیس تھانوں کے حدود میں بندشیں عائد کی گئیں، حتیٰ کہ لالچوک سمیت کئی مزید علاقوں میں فوبائل انٹر نیٹ سروس بھی معطل کی گئی۔
معلوم ہوا ہے کہ منگل کو آبی گذر اور اسکے گردونواح میں بندشیں عائد رکھنے کا قوی امکان ہے اور لالچوک کے آس پاس سیول لائنز کے2یا تین پولیس تھانوں کے حدود میںدفعہ144نافذ رہ سکتا ہے۔حکام نے بتایا کہ آبی گذر کے علاوہ شہر کے کسی اور جگہ پر بندشیں عائد نہیں رہیں گی اور بٹہ کدل لالبازار سے جڈی بل تک سب سے بڑے جلوس کیلئے انتظامات کو حتمی شکل دی گئی ہے جس کے بعد سرکاری طور پر معاونت فراہم کی جائیگی۔ حکام کا کہنا ہے کہ امن و قانون برقرار رکھنے کے لئے شعیہ فرقے سے تعاون طلب کرلیا گیا ہے جسکی یقین دہانی کرائی گئی ہے۔عزاداروں کے جلوسوں کیلئے مکمل سیکورٹی بندوبست کیا جارہا ہے۔ادھر بڈگام میں بھی علم شریف کے بہت بڑے جلوس نکالے جارہے ہیں جس کے لئے ضلع انتظامیہ کا سیکورٹی بندوبست مکمل ہے۔بڈگام اور جڈی بل کے علاوہ گانگو پلوامہ، برین نشاط،میر گنڈ، ایچھ گام بڈگام، پٹن، سمبل سونہ واری اور دیگر درجنوں مقامات پر آج ذوالجناح کے جلوس نکالے جارہے ہیں۔دریں اثناء شہر سرینگر میں 9ویں محرم کو جھیل ڈل کے اندرونی علاقوں میں تازیہ کے جلوس نکالے گئے۔
شہدائے کربلا کو ایل جی کا خراج عقیدت
سرینگر//لیفٹیننٹ گورنرمنوج سنہا نے یوم عاشورہ کے موقعہ پرکربلا کے شہداء کو خراج عقیدت پیش کرتے ہوئے ان کی قربانیوں کو یادکیا۔اپنے پیغام میں لیفٹیننٹ گورنر نے کہا کہ حضرت امام حسین ؓ اور ان کے ساتھیوں نے انسانیت کو انصاف،اقدار،اورسچائی کاراستہ دکھایا۔لیفٹننٹ گورنر نے جموں کشمیر میں قیام امن کی دعا کی اورلوگوں پرزوردیاکہ وہ ضرورتمندوں کے ساتھ ہمدردی کاسلوک کریں۔
