آئی سی سی کی نئی ٹیسٹ درجہ بندی، اسٹیو اسمتھ سر فہرست،اظہر علی کا ساتواں نمبر

 لوہور//آئی سی سی کی جانب سے جاری کردہ نئی درجہ بندی کے مطابق آسٹریلیوی کپتان اسٹیو اسمتھ بدستور پہلے نمبر پر براجمان ہیں، جبکہ دوسرے نمبر پر انگلش بیٹسمین جو روٹ اور تیسرے نمبر پر نیوزی لینڈ کے کین ولیمسن موجود ہیں۔ٹیسٹ رینکنگ میں سرفہرست 20 بلے بازوں میں پاکستان کے واحد کھلاڑی اظہر علی ہیں جو ایک درجے ترقی حاصل کر کے ساتویں نمبر پر موجود ہیں۔باؤلنگ کے شعبے میں میں کوئی تبدیلی نہیں آئی اور بھارت کے رویندرا جدیجا بدستور پہلے، انگلینڈ کے جیمز اینڈرسن دوسرے اور بھارت ہی کے روی چندرن ایشون تیسرے نمبر پر موجود ہیں۔بیٹنگ کے شعبے کی طرح باؤلنگ میں بھی کوئی پاکستانی نمایاں ترقی حاصل نہیں کرسکا تاہم لیگ اسپینر یاسر شاہ ٹاپ 20 سرفہرست باؤلروں کی فہرست میں چودھویں (14) نمبر پر موجود ہیں۔آئی سی سی ٹیسٹ آل راؤنڈر کی فہرست میں بنگلہ دیش کے شکیب الحسن نے ایک درجہ ترقی حاصل کرکے بھارت کے جدیجا سے پہلی پوزیشن چھین لی ہے، رویندر جدیجا دوسرے اور بھارت کے ہی روی چندرن ایشون تیسرے نمبر پر موجود ہیں۔آل راؤنڈرز کی درجہ بندی میں پاکستان کے صرف محمد حفیظ 20 سرفہرست آل راؤنڈرز میں موجود ہیں جہاں ان کا نمبر سولھواں ہے۔حال ہی میں سری لنکا کے خلاف 3 میچوں کی ٹیسٹ سیریز میں کلین سوئپ کرنے والی بھارتی ٹیم کے کھلاڑیوں کی رینکنگ بہتر ہوئی۔بھارت کے لوکیش راہول پہلی بار دس سرفہرست بلے بازوں میں شامل ہوگئے ہیں اور ان کا نواں نمبر ہے جبکہ اوپننگ بلیباز شیکھر دھون دس درجہ ترقی کے بعد اٹھائیسویں نمبر پر پہنچ گئے ہیں۔ٹیسٹ کرکٹ میں ٹیموں کی درجہ بندی میں سری لنکا کو سیریز میں وائٹ واش کرنے والی بھارتی ٹیم 125 پوائنٹس کے ساتھ پہلے نمبر پر موجود ہے، جنوبی افریقہ 110 پوائنٹس کے ساتھ دوسرے، انگلینڈ 105 پوائنٹس کے ساتھ تیسرے، آسٹریلیا 100 پوائنٹس کے ساتھ چوتھے اور نیوزی لینڈ 97 پوائنٹس کے ساتھ پانچویں نمبر پر موجود ہے۔پاکستانی ٹیم 93 پوائنٹس کے ساتھ چھٹینمبر، سری لنکا 90 پوائنٹس کے ساتھ ساتویں، ویسٹ انڈیز 75 پوائنٹس کے ساتھ آٹھویں، بنگلہ دیش 69 پوائنٹس کے ساتھ نویں اور زمبابوے بنا کسی پوائنٹس کے ساتھ دسویں نمبر پر موجود ہے۔