کام کا بوجھ کچھ ہلکا کرنے کے لئے اس نے ایک مشین خرید لی تھی اور اس کا یہ فیصلہ بہت مفیدثابت ہوا۔اب نہ صرف اس کا وقت بچ رہا تھا اورمشقت کم ہو گئی تھی بلکہ فصل کی پیداوار میں بھی خاطر خواہ اضافہ دیکھنے کو ملا تھا۔
اپنی سال بھر کی ضرورتوں کا حساب لگانے کے بعد اُس سال کچھ اناج اس نے مارکیٹ میں فروخت بھی کردیا تھا۔ پھر بھی نئی فصل کے تیار ہوجانےتک اس کے پاس پرانا غلہ پڑاتھا جو خراب ہونے لگا تو اس نے کچھ ناداروں کو بلا کر دان کردیا۔اگلے سال انہی لوگوں کو لگا کر اس نے کھیت سے متصل بے کار پڑی زمین سے خود رو پیڑ پودے کٹوا ئے اور اس میں بوائی کردی۔
اپنے خالی وقت کو اس نے دوسری مشغولیات میں بانٹ لیا ۔سماجی اور ثقافتی سرگرمیوں میں حصہ لینا اب اس کے لئے آسان تھا۔جلد ہی اس کا شمار معاشرے کے سر کردہ لوگوں میں ہونے لگا۔ گھر، کھیت، کیچڑ، جنگل، تالاب کے گرد گھومنے والی زندگی میں اب گویا نئی ترجیحات نے جگہ بنا لی تھی۔صحت تو خیر اس کی پہلے بھی بہت اچھی تھی لیکن اب چونکہ جسمانی محنت نہ کے برابر تھی اس کا ڈیل ڈول مزید نکھر گیا تھا۔اور یہ سب اس مشین کی بدولت ہی ممکن ہوا تھا جو کسی نعمتِ غیر مترقبہ کی طرح آ کراس کی کایا پلٹ رہی تھی۔خون پسینے سے سینچے ہوئے ان تین دیو قامت پیڑوں کو کاٹ کر بیچنے کا دکھ اسے ضرور ہواتھا جن سے مشین کی قیمت ادا کی گئی تھی، لیکن اب وہ مطمئن تھا ۔مشین اپنی قیمت سے زیادہ قیمتی تھی۔
سب کچھ ٹھیک ٹھاک چل رہاتھا کہ ایک دن اچانک مشین چلتے چلتے رک گئی۔ پچھلے سالوں کا تجربہ استعمال میں لاتے ہوئے اس نے بہتر کوشش کی کہ کل پُرزے کَس کر اسے ٹھیک کر لے لیکن ناکام رہا۔اس سے پہلے جب بھی کبھی اس میں مرمت کی ضرورت پیش آئی تھی ،آسانی سے ہو گئی۔ لیکن اس بار وہ سارے حربے اور ارد گرد کے سبھی مستری آزما چکا تھا۔دس دنوں کے انتظار کے بعد شہر سے پہنچنے والا انجینئر بھی ہار مان کر جا چکا تھا۔
کھیتی کا موسم جارہاتھا اس لئے فی الحال اسے اپنے آپ پر ہی تکیہ کرنا تھا۔سٹور سے پرانے اوزار نکال کر وہ کھیت کی طرف چل پڑا۔اس روز اسے احساس ہوا کہ بڑھاپے نے اس کے جسم پر حق جمانا شروع کر دیا تھا۔
کام شروع کرنے سے پہلے اس نے سوچا کہ پہلے مشین کو کھیت سے باہر ہٹا دے ۔اس نے مشین بمشکل کاندھے پر اٹھا ئی اور کھیت کے اس حصے کی جانب چل دیا جہاں کچھ کباڑ رکھا تھا۔
"کہاں جا رہے ہو؟" یہ آواز مشین کی تھی۔لیکن وہ اسے اپنا وہم سمجھ کر نظر انداز کر گیا۔
"میں نے پوچھا کہاں جا رہے ہو" اب کی بار مشین کا ایک بڑا سا پرزہ زور سے اس کی کمر پر آ کر بجا۔وہ حیرت زدہ رہ گیا۔
"تمھیں کھیت سے باہر رکھنے جارہاہوں"
"اچھا تو جب تک میں کام کی تھی ساتھ چمٹائے رکھا اور اب کام کی نہیں رہی تو مجھ سے چھٹکارا چاہتے ہو"
"ہاں ایسا ہی سمجھو" ۔
"لیکن میں تمہیں چھٹکارا دوں تب نا!" مشین کے دو پُرزے لڑھکتے ہوئے اس کی گردن کے گرد حمائل ہو گئے۔
"کیا مطلب" وہ کچھ سہما لیکن آگے بڑھتا گیا
"مطلب یہ کہ اب تم مجھے اپنے کاندھے سے اتار نہیں سکتے"
"اوہم م م ۔۔۔دیکھتے ہیں" اس نے پورا زور لگا کر اس بوجھ کو پھینکنے کی کوشش کی لیکن مشین نے اس کا اوپری دھڑ جکڑ لیا۔اس نے اپنے بازووں میں پوری ہمت جُٹا کر پھر کوشش کی کہ اس آفت کو اپنے جسم سے الگ کر سکے لیکن اس بار مشین کی پکڑ زیادہ مضبوط بلکہ درد ناک تھی ۔وہ لڑکھڑا کر گرنے لگا تھا کہ بمشکل ایک لمبی سی جھاڑی کا سہارا لے کر سنبھلا اور سیدھا کھڑا ہو گیا۔ مشین کے ساتھ ہوئی چند ثانیوں کی زور آزمائی نے ہی اسے تھکا دیا تھا۔کھڑے کھڑے اپنی سانسیں بحال کرنے کے بعد وہ ناچار پھر چلنے لگا ۔مشین بدستور اس کے مونڈھوں سے چمٹی تھی۔ کچھ دور تک چلنے کے بعد وہ کچھ سوچتے ہوئے واپس مڑنے لگا لیکن کاندھے پر پڑی ساکت مشین میں فوراًحرکت ہوئی
"کیوں ؟ رک کیوں گئے؟ مڑ کر کہاں جارہے ہو؟" اس بار آواز میں ایک ترشی تھی۔
"تمھیں جہاں سے اٹھایا تھا وہیں چھوڑ دیتا ہوں۔پڑی رہو کھیت میں ہی"
"مجھے وہاں کیا کرنا ہے؟ اور تمھیں بھی اب وہاں کیا کرنا ہے؟"
مشین کی بات کا جواب دینے کی بجائے وہ اپنے تازہ فیصلے کے مطابق مڑ کر کھیت میں چلنے لگا۔ چند قدم آگے بڑھا تھا کہ اس بار ایسا زاوردار جھٹکا لگا گویا مشین نہ ہو کوئی غیر مرئی ہاتھ ہو جس نے پورے زور پکڑ کر اسے مخالف سمت میں دھکا دے دیا ہو۔سنبھلنے کے لئے اس نے ایک ٹنڈ منڈ سے درخت کاسہارا لینا چاہا لیکن سوکھا ہوا تنا اندر سے سڑ بھی چکا تھا۔اچھا یہ ہوا کہ وہ اس کے اوپر آگرنے کی بجائے ہاتھ چھوتے ہی دھڑام سے دوسری طرف جا گرا۔
"باہر کی طرف چلو۔کھیت سے باہر" آواز آئی
"مگر میں۔۔۔۔" جھنجھلاہٹ میں گھلی ہوئی بے بسی اس کی آواز میں صاف جھلک رہی تھی۔مجبوراً اس نے پھر مخالف سمت میں چلنا شروع کیا۔تھوڑی دیر میں وہ کھیت پار کر کے آگے بڑھ گیا۔وہ چلتا رہا۔اس دوران مشین اس کے شانے پر بالکل ساکت ٹکی تھی، کوئی آواز ،کوئی ہل جل، بالکل کچھ نہیں ۔ایک ہلکی سی ڈھلوانی سطح پر چڑھتے ہوئے اس نے مڑ کر پیچھے نظر دوڑائی ۔وہ کافی دور نکل آیا تھا۔
"چلتے جاؤ" حکم صادر ہوا
مشین کا وزن ہر لمحے بڑھ رہا تھا اور وہ مسلسل چلتا جارہاتھا۔۔۔۔۔کھیت کھلیان، گاؤں، چراہ گاہ، تالاب، جنگل، پہاڑ، دریا، نالے سب پیچھے چھوٹ گئے لیکن وہ چلتا جارہاتھا۔
���
راجوری، جموں کشمیر،
