اودھم پور میں بین ضلعی منشیات فروش گرفتار، ممنوعہ مواد بر آمد: پولیس

عظمیٰ ویب ڈیسک
سرینگر/منشیات کے خلاف مہم کو جاری رکھتے ہوئے جموں و کشمیر پولیس نے ضلع اودھم پور میں ایک بین ضلعی منشیات فروش کو گرفتار کرکے اس کی تحویل سے ممنوعہ مواد بر آمد کیا ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن رحام بل کی ایک ٹیم نے رحام بل میں ایک معمول کے ناکے کے دوران ایک مشتبہ شخص جو ٹکری سے رحام بل کی طرف پیدل سفر کر رہا تھا، کو روکا۔
انہوں نے کہا کہ اس شخص نے پولیس کو دیکھ کر واپس چلنے کی کوشش کی جس پر پولیس کو اس پر شک ہوا۔بیان میں کہا گیا کہ تلاشی کے دوران اس کی تحویل سے 4.40 گرام ہیرائن جیسا ممنوعہ مواد بر آمد کیا گیا جس کے بعد اس کی گرفتاری عمل میں لائی گئی۔
گرفتار شدہ کی شناخت انفس شوکت گنائی ولد شوکت احمد گنائی ساکن صفا کدل سری نگر کے طور پر کی گئی ہے۔پولیس ترجمان نے بتایا کہ اس ضمن میں پولیس اسٹین رحام بل میں این ڈی پی ایس ایکٹ کی متعلقہ دفعات کے تحت ایک کیس درج کرکے مزید تحقیقات شروع کی گئیں۔