انگلینڈ کی دوسرے ٹیسٹ پر گرفت مضبوط

کرائسٹ چرچ/ انگلینڈ نے نیوزی لینڈ کے خلاف دوسرے ٹیسٹ کے تیسرے دن اتوار کو اپنی دوسری اننگز میں تین وکٹ پر 202 رنز بنا کر اپنی برتری کو 231 رنز پہنچا کر میچ پر گرفت مضبوط کر لی ہے ۔نیوزی لینڈ نے چھ وکٹ پر 192 رن سے آگے کھیلنا شروع کیا اور اس کی پہلی اننگز 278 رنز پر ختم ہوئی۔بي جے واٹلنگ نے 77 رن سے آگے کھیلتے ہوئے 220 گیندوں میں 11 چوکوں اور ایک چھکے کی مدد سے 85 رن بنائے ۔ٹم ساؤتھی نے 13 رنز سے اپنی اننگز آگے بڑھائی اور 48 گیندوں میں آٹھ چوکوں اور ایک چھکے کے سہارے 50 رن بنائے ۔دسویں نمبر کے بلے باز نیل ویگنر نے 27 گیندوں میں ناٹ آؤٹ 24 اور ٹرینٹ بولٹ نے 16 رنز بنا کر نیوزی لینڈ کو 278 تک پہنچایا۔دونوں نے آخری وکٹ کے لئے 39 رن کی ساجھے داری کر انگلینڈ کو بڑی برتری لینے سے روک دیا۔انگلینڈ کو پہلی اننگز میں 29 رنز کی برتری حاصل ہوئی۔تیز گیند باز اسٹورٹ براڈ نے 22.3 اوور میں 54 رن دے کر چھ وکٹ حاصل کئے اور اپنے کیریئر میں 16 ویں بار اننگز میں پانچ وکٹ لئے ۔ان کے جوڑی دار جیمز اینڈرسن نے 24 اوور میں 76 رن پر چار وکٹ لئے ۔اینڈرسن نے واٹلنگ اور ساؤتھی دونوں کو بولڈ کیا۔انگلینڈ کی دوسری اننگز میں اسٹون مین نے 139 گیندوں میں چھ چوکوں کی مدد سے 60 اور ونس نے 128 گیندوں میں 10 چوکوں کے سہارے 76 رن بنائے ۔دونوں چائے کے وقفہ کے بعد کے سیشن میں آؤٹ ہوئے اور اپنی اپنی پہلی سنچری بنانے سے چوک گئے ۔ ایلیسٹیر کک 14 رنز بنا کر آؤٹ ہوئے ۔ٹرینٹ بولٹ نے کک اور ونس کے وکٹ لئے ۔اسٹمپس کے وقت کپتان کو رٹ 30 اور ڈیوڈ ملان 19 رنز بنا کر کریز پر تھے ۔انگلینڈ کو دو ٹسٹ میچوں کی سریز برابر کرنے کے لئے یہ میچ جیتنے کی ضرورت ہے ۔