انعام الحق کی بنگلہ دیشی ٹیسٹ ٹیم میں واپسی

ڈھاکہ/یو این آئی/زمبابوے کے خلاف پہلے ٹیسٹ میچ میں شکست کے بعد بنگلہ دیش نے ان فارم اوپنر انعام الحق کو دوسرے ٹیسٹ میچ کے لیے ٹیم میں واپس بلا لیا ہے ۔ بنگلہ دیش نے ظہور احمد چودھری اسٹیڈیم میں 28 اپریل سے شروع ہونے والے دوسرے ٹیسٹ کے لیے اپنی ٹیم میں دو تبدیلیاں کی ہیں۔ دوسرے ٹیسٹ کے لیے انعامول کے ساتھ ان کیپڈ لیفٹ آرم اسپنر تنویر اسلام کو ٹیم میں شامل کیا گیا ہے جبکہ اوپنر ذاکر حسن اور فاسٹ بولر ناہید رانا کو اسکواڈ سے ڈراپ کردیا گیا ہے ۔ انعامول نے جون 2022 میں ویسٹ انڈیز کے خلاف کھیلنے کے بعد سے کوئی ٹیسٹ میچ نہیں کھیلا ہے ۔ ڈومیسٹک سطح پر ان کی عمدہ کارکردگی کی بنیاد پر انہیں 15 رکنی ٹیم میں جگہ دی گئی ہے ۔ انہوں نے ڈھاکہ پریمیئر لیگ میں غازی گروپ کے لیے مسلسل سنچریاں لگائی ہیں۔ بنگلہ دیش کا 15 رکنی اسکواڈ اس طرح ہے : نظم الحسن شانتو (کپتان)، محمود الحسن جوئے ، شادمان اسلام، انعام الحق، مومن الحق، مشفق الرحیم، معید الاسلام انکون، ذاکر علی، مہدی حسن میراج، تیج الاسلام، نعیم حسن، محمد حسن، تنویر اسلام، حسن محمود، خالد احمد اور محمد تنظیم حسن ثاقب۔یو این آئی