عظمیٰ نیوزسروس
جموں//مرکزی وزیر جتیندر سنگھ نے اتوار کو کہا کہ شہری انتظامیہ، فوجی اور نیم فوجی دستے حرکت میں آگئے ہیں اور جموں و کشمیر کے بادل پھٹنے سے متاثرہ کٹھوعہ ضلع میں بچاؤ اور امدادی کارروائیوں کے لیے ہیلی کاپٹر خدمات کو شامل کیا ہے۔اتوار کی صبح کٹھوعہ ضلع میں بادل پھٹنے اور مٹی کے تودے گرنے کے دو الگ الگ واقعات میں کم از کم سات افراد ہلاک اور چھ دیگر زخمی ہوگئے۔ یہ آفت راجباغ اور جنگلوٹ کے جودھ گھاٹی گاؤں میں رات بھر کی شدید بارش کے درمیان آئی۔جتندرسنگھ نے ایک ایکس پوسٹ میں لکھا’’جنگلوٹ علاقے میں بادل پھٹنے کی اطلاع ملنے کے بعد کٹھوعہ کے ایس ایس پی شوبھت سکسینہ سے بات کی۔جنگلوٹ میں چار ہلاکتوں کی اطلاع ملی ہے۔ اس کے علاوہ ریلوے ٹریک اور قومی شاہراہ کو بھی نقصان پہنچا ہے، جبکہ کٹھوعہ پولیس اسٹیشن بھی متاثر ہوا ہے”۔انہوں نے کہا کہ شہری انتظامیہ، فوجی اور نیم فوجی دستے کارروائی میں آ گئے ہیں۔انہوں نے مزید کہا کہ صورتحال پر مسلسل نظر رکھی جا رہی ہے۔انہوں نے کہا کہ زخمیوں کو مناسب ہسپتالوں میں منتقل کرنے کے لیے ہیلی کاپٹر کی خدمات کا انتظام کیا گیا ہے۔انکامزید کہناتھا’’چھ زخمیوں کو مامون، پٹھانکوٹ میں ہسپتال میں داخلے کے لیے ہوائی جہاز سے لے جایا گیا ہے، جو کہنسبتاً قریب کی منزل پائی گئی ‘‘۔ وزیر نے لکھا “مرنے والوں کے اہل خانہ سے میری دلی تعزیت‘‘۔سنگھ نے کہا کہ ڈپٹی انسپکٹر جنرل آف پولیس شیو کمار شرما اپنی ٹیم کے ساتھ جائے وقوعہ پر ڈیرے ڈالے ہوئے ہیں اور ان کے ساتھ مسلسل رابطے میں ہیں۔ انہوں نے مزید کہا کہ ضرورت پڑنے پر مزید امداد کا بندوبست کیا جائے گا۔
