عظمیٰ نیوز سروس
سرینگر//اپنی پارٹی چیئرمین الطاف بخاری نے بدھ کو کہا کہ اسمبلی انتخابات جموں و کشمیر میں خوشحالی کی ایک نئی شروعات ہوں گے۔بخاری نے، جن کے حلقہ انتخاب میں بدھ کو پولنگ ہوئی،سری نگر میں میڈیا نمائندوں کو بتایا، اللہ تعالی کا شکر ہے کہ آخرکار وہ دن آیا اور میں نے اپنا ووٹ ڈالا۔انہوں نے کہا کہ میں لوگوں کو مبارکباد دیتا ہوں کہ انہوں نے ووٹ ڈالنے کے لیے اتنے سالوں کا انتظار کیا۔بخاری نے کہا”میں نے اپنا ووٹ کاسٹ کیا، مجھے یقین ہے کہ یہ الیکشن جموں و کشمیر میں خوشحالی کی ایک نئی شروعات ہوں گے‘‘۔یہ پوچھے جانے پر کہ ان کی پارٹی ان اسمبلی انتخابات میں کیا کردار ادا کرنے جا رہی ہے۔ بخاری نے کہا “2019 کے بعد، اپنی پارٹی کے پاس بہت اہم ہے، نہ صرف یہ کہ پارٹی کتنی سیٹیں جیتنے والی ہے بلکہ قیادت کیا دے سکتی ہے‘‘۔انہوں نے کہا کہ جو بھی حکومت آئے گی انہیں جمہوریت پر نوجوانوں کے اعتماد کا بدلہ دینا چاہئے جو انہوں نے انتخابات میں دکھایا ہے۔انہوں نے زور دیا”حکومت ہند کو بھی اس مثبت تبدیلی کو دیکھنا چاہیے، اور کئی سالوں سے زیر التوا نوجوانوں کے پاسپورٹ جاری کیے جائیں، ان کا وقار بحال ہونا چاہیے‘‘ ۔بخاری نے کہا کہ جمہوریت میں نوجوانوں کا اعتماد، جیسا کہ ان کی شرکت سے ظاہر ہوتا ہے، اس کا بدلہ عام معافی سے لیا جانا چاہیے۔جو قیادت اقتدار میں آئے گی اسے نوجوانوں کے بارے میں بھی سوچنا ہوگا۔ایک سوال کے جواب میں بخاری نے کہا کہ ہم کسی نیشنل کانفرنس، پیپلز ڈیموکریٹک پارٹی، کانگریس یا بھارتیہ جنتا پارٹی کے ساتھ نہیں ہیں ان سب نے جموں و کشمیر کو نقصان پہنچایا ہے۔
