یو این آئی
نئی دہلی//ہندوستان نے امریکی کمیشن برائے بین الاقوامی مذہبی آزادی (یو ایس سی آئی آر ایف)کی اپنی 2025کی سالانہ رپورٹ میں ہندوستان میں مذہبی آزادی پر ایک بار پھر سوال اٹھانے پر سخت اعتراض کیا ہے اور کہا ہے کہ جمہوریت اور رواداری کی علامت کے طور پر ہندوستان کی پوزیشن کو کمزور کرنے کی یوایس سی آئی آر ایف کی اس طرح کی کوششیں کامیاب نہیں ہوں گی۔یو ایس سی آئی آر ایف کی رپورٹ کے بارے میں میڈیا کے سوالات کا جواب دیتے ہوئے وزارت خارجہ کے ترجمان رندھیر جیسوال نے کہاکہ “ہم نے حال ہی میں جاری کی گئی امریکی کمیشن برائے بین الاقوامی مذہبی آزادی(یو ایس سی آئی آر ایف)کی 2025کی سالانہ رپورٹ دیکھی ہے، جو ایک بار پھر متعصب اور سیاسی طور پر محرکات کو پیش کرنے کے اپنے دیرینہ طرز پر انحصار کرتی ہے‘‘۔ جیسوال نے کہاکہ “یو ایس سی آئی آر ایف کی جانب سے مختلف واقعات کو غلط انداز میں پیش کرنے اور ہندوستان کے متحرک کثیر ثقافتی معاشرے پر شکوک پیدا کرنے کی کوششیں مذہبی آزادی کے لیے حقیقی تشویش کے بجائے ایک سوچے سمجھے ایجنڈے کی عکاسی کرتی ہیں‘‘۔ترجمان نے کہاکہ “جمہوریت اور رواداری کی روشنی کے طور پر ہندوستان کی حیثیت کو کمزور کرنے کی اس طرح کی کوششیں کامیاب نہیں ہوں گی۔ درحقیقت، یہ یوایس سی آئی آر ایف ہے جسے تشویش کا باعث سمجھا جانا چاہئے۔
