یو این آئی
نیویارک// امریکا کی مشرقی ریاستوں میں شدید بارشوں اور برفانی طوفان سے 5افراد ہلاک جبکہ متعدد زخمی ہوگئے۔ طوفانی برفباری کے باعث ہر شے نے سفید چادر اوڑھ لی، گھر، گاڑیاں، سڑکیں برف سے ڈھک چکی ہیں۔نیویارک سمیت 12ریاستوں میں 4لاکھ سے زائد مکانات اور کاروباری مراکز بجلی سے محروم ہیں،نیو جرسی اور کنکٹی کٹ میں دریاوں میں پانی کی سطح بلند ہونے اور ڈیم کو نقصان پہنچنے سے شہری گھر چھوڑنے پر مجبور ہیں۔شدید بارشوں کی وجہ سے ساڑھے تیرہ ہزار پروازیں منسوخ اور850سے زائد تاخیر کا شکار ہیں۔ادھر مشرقی منگولیا میں شدید برف باری کی وجہ سے کار میں پھنس جانے سے دو بچوں سمیت چار افراد کی موت ہو گئی۔ملک کی نیشنل ایمرجنسی مینجمنٹ ایجنسی نے جمعہ کو یہ اطلاع دی۔ ایجنسی نے ایک بیان جاری کرتے ہوئے کہا کہ کار میں سفر کر رہے ایک ہی خاندان کے چاروں افراد منگل کو سکھباتر صوبے کے دریگنگا سوم سے دیہی علاقے میں اپنے گھر واپس آتے ہوئے برف میں پھنس گئے ۔
