عظمیٰ نیوزسروس
سرینگر//پیر کی صبح سخت سیکورٹی انتظامات کے درمیان 8600سے زائد یاتری جموں کے بھگوتی نگر بیس کیمپ سے ہمالیہ میں واقع امرناتھ کی سالانہ یاترا کیلئے روانہ ہوئے۔یاترا کا آغاز 3جولائی سے دو راستوں، پہلگام(ضلع اننت ناگ)اور بالتل (ضلع گاندربل)سے ہوا ہے اور اب تک 70,000سے زائد یاتری 3,880میٹر کی بلندی پر واقع گھپامیں درشن کر چکے ہیں۔چھٹے قافلے میں 8,605 یاتری شامل ہیں جن میں 6,486 مرد، 1,826 خواتین، 42 بچے اور 251 سادھو و سادھوی شامل ہیں۔ یہ قافلہ صبح 3:30 اور 4:25 بجے کے درمیان 372 گاڑیوں میں کشمیر کے دو بیس کیمپس کی جانب روانہ ہوا۔پہلا قافلہ 3,486یاتریوں پر مشتمل تھا جو 166گاڑیوں میں نسبتا چھوٹے مگر دشوار بالتال راستے سے روانہ ہوا، جبکہ دوسرا قافلہ 5,119یاتریوں پر مشتمل تھا جو 206 گاڑیوں میں 48 کلومیٹر طویل روایتی پہلگام راستے سے روانہ ہوا۔یہ بدھ کے بعد سے اب تک کا سب سے بڑا قافلہ تھا، جب لیفٹیننٹ گورنر منوج سنہا نے 2 جولائی کو جموں سے یاترا کا باقاعدہ آغاز کیا تھا۔ اس کے ساتھ اب تک 40,361 یاتری جموں بیس کیمپ سے وادی کشمیر روانہ ہو چکے ہیں۔رجسٹریشن کیلئے بڑی تعداد میں یاتری جموں پہنچ رہے ہیں جس کے باعث موقع پر رجسٹریشن کے کاونٹرز اور روزانہ کوٹہ بڑھا دیا گیا ہے تاکہ رش کم ہو سکے۔ 3,000 سے زائد عقیدت مند ملک کے مختلف حصوں سے رجسٹریشن کے لیے جموں پہنچے ہیں۔ یاتریوں نے کہا کہ وہ 22اپریل کو پہلگام میں ہونے والے حملے سے خوفزدہ نہیں، بلکہ وہ پوری عقیدت کے ساتھ بھگوان شیو کے درشن کے لیے روانہ ہو رہے ہیں۔ ان کا کہنا تھا کہ وہ شیو بھگوان سے کشمیر سے ملی ٹینسی کے مکمل خاتمے کی دعا کریں گے ۔قابل ذکر ہے کہ اب تک 3.5لاکھ سے زائد افراد نے آن لائن رجسٹریشن کرائی ہے۔ جموں میں 34 رہائشی مراکز قائم کیے گئے ہیں اور یاتریوں کو ریڈیو فریکوئنسی آئیڈنٹیفکیشن (RFID) ٹیگ جاری کیے جا رہے ہیں۔ موقع پر رجسٹریشن کے لیے 12 کاونٹر قائم کیے گئے ہیں۔جموں صوبہ میں لکھن پور سے بانہال تک 50,000 سے زائد افراد کے قیام و طعام کا بندوبست کیا گیا ہے۔ مجموعی طور پر 106 رہائشمراکز قائم کیے گئے ہیں۔
۔4یاتری زخمی
زیڈ موڑ پرگاڑی حادثے کا شکار
سرینگر// پہلگام میں چندن واری کے قریب زیڈ موڑ کے مقام پرپیر کے روز امرناتھ یاتریوں کو لے جانے والی ایک گاڑی حادثے کا شکار ہوگئی ، جس کے نتیجے میں کم از کم چار افراد زخمی ہو گئے، جس میں تین یاتری گجرات سے تعلق رکھتے ہیں جبکہ گاڑی کا مقامی ڈرائیور بھی زخمیوں میں شامل ہے۔سرکاری ذرائع کے مطابق ٹیکسی زیر نمبر JK03C-5073چندن واری روٹ پر اس وقت حادثے کا شکار ہو گئی جب گاڑی کا توازن بگڑ گیا اور وہ سڑک سے نیچے جا گری۔زخمیوں میں تین یاتری گجرات کے رہائشی ہیں جبکہ ڈرائیور کا تعلق پہلگام سے ہے۔ تمام زخمیوں کو فوری طور پر قریبی ہسپتال منتقل کیا گیا، جہاں ان کی حالت کو مستحکم قرار دیا گیا ۔مقامی پولیس نے واقع کا نوٹس لیتے ہوئے ضروری کارروائی شروع کر دی۔
