نیوز ڈیسک
سرینگر// ایک دفاعی عہدیدار نے بتایا کہ آئندہ امرناتھ یاترا کے کامیاب انعقاد کے لئے ہفتہ کو یہاں ایک سیکورٹی کانفرنس کا انعقاد کیا گیا۔ دفاعی ترجمان کرنل ایمرون موسوی نے کہا کہ سیکورٹی فورسز اور سول انتظامیہ کے اہلکاروں کی ایک مشترکہ سیکورٹی کانفرنس کا مقصد ایک ہموار اور واقعات سے پاک سالانہ یاترا کے لیے ہم آہنگی، بات چیت اور تال میل کو بڑھانا تھا۔ 62 روزہ یاترا کا آغاز یکم جولائی کو دو راستوں پہلگام میں روایتی 48 کلومیٹر کا نونون اور 14 کلومیٹر بالتل راستہ سے ہونا ہے۔
ترجمان کرنل موسوی نے کہاکہ یاترا کی سیکورٹی کو متاثر کرنے والے باہمی دلچسپی کے اہم امور پر بات چیت کی گئی۔انہوں نے کہا کہ عہدیداروں نے تقریب کو کامیاب بنانے کے لئے حکومت اور سیکورٹی ایجنسیوں کے ہم آہنگی سے کام کرنے کی ضرورت پر زور دیا۔موجودہ داخلی سلامتی کی صورتحال کے پیش نظر، ایک ہموار اور واقعات سے پاک یاترا کے متعین کردہ اہداف کے حصول کے لیے مربوط کوششوں کے لیے سیکیورٹی ایجنسیوں اور سول انتظامیہ کے درمیان مکمل ہم آہنگی کو یقینی بنانے کے لیے سیکیورٹی کا جائزہ بھی لیا گیا۔
