سرینگر//اپنی پارٹی کے سربراہ سید الطاف بخاری پیر کو نئی دہلی میں وزیر اعظم نریندر مودی سے ملے اور جموں کشمیر میں فور جی انٹرنیٹ سروسز اور ریاستی درجے کی بحالی کا مطالبہ کیا۔
اپنی پارٹی کے ایک بیان کے مطابق بخاری اور وزیر اعظم کے درمیان میٹنگ کم و بیش ایک گھنٹے تک جاری رہی جس کے دوران بخاری نے مودی کو مطالبات پر مشتمل ایک یادداشت پیش کی۔
بخاری نے جموں کشمیر کیلئے انڈسٹریل مالی پیکیج دینے کیلئے وزیر اعظم کا شکریہ ادا کیا۔
بیان کے مطابق بخاری نے وزیر اعظم سے مطالبہ کیا کہ جموں کشمیر کا ریاستی درجہ بحال کیا جائے اور یہاں فور جی انٹر نیٹ سروسز بحال کی جائیں۔انہوں نے وزیر اعظم سے جموں کشمیر کیلئے ایک روزگار پیکیج کا بھی مطالبہ کیا۔
بخاری نے کشمیری پنڈتوں کی وطن واپسی کے اقدامات اٹھانے کا بھی مطالبہ کیا ۔انہوں نے سرینگر ۔جموں شاہراہ کی خراب حالت کے بارے میں وزیر اعظم کو آگاہی دلاتے ہوئے متبادل شاہراہ جیسے مغل روڑ کی ترقی کا بھی مطالبہ کیا۔
