بارہمولہ//تعلیم کے وزیر سید محمد الطاف بخاری نے ضلع ترقیاتی بورڈ بارہمولہ کی میٹنگ کی صدارت کرتے ہوئے گزشتہ بورڈ میٹنگ میں لئے گئے فیصلوں پر عمل در آمد کا جائزہ لیا۔بارہمولہ کی شان رفتہ بحال کرنے کا عزم دہراتے ہوئے وزیر تعلیم نے کہا کہ اس سلسلے میں تمام کوششیں بروئے کار لائی جارہی ہیں۔میٹنگ میں باغبانی کے وزیر سید بشارت بخاری ، ممبران اسمبلی جاوید حسن بیگ، محمد عباس وانی ، عبدالرشید ڈار ، رکن قانون ساز کونسل غلام نبی مونگا اور ضلع ترقیاتی کمشنر ڈاکٹر ناصر نقاش کے علاوہ ضلع انتظامیہ کے اعلیٰ افسران موجود تھے۔میٹنگ میں مختلف پروجیکٹوں پر جاری کام کی پیش رفت کا جائزہ لینے کے علاوہ ضلع میں مختلف کاموں پر اب تک کی حصولیابیوں کا جائزہ لیا گیا ۔ضلع ترقیاتی کمشنر ڈاکٹر ناصر نقاش نے میٹنگ میں ایک پاور پوائنٹ پرزنٹیشن کے ذریعے ضلع میں جاری مختلف ترقیاتی سرگرمیوں کے بارے میں تفصیلات دیں۔میٹنگ میں بتایا گیا کہ سال 2017-18ءکے دوران 25435.66لاکھ روپے کے منظور شدہ آوٹ لے میں سے مئی 2017ءتک 3125.44لاکھ روپے دستیاب کرائے گئے جس میں اب تک 422.44لاکھ روپے خرچ کئے جاچکے ہیں۔میٹنگ میں بتایا گیا کہ دیہی ترقی محکمہ میں این آر ایل ایم کے تحت 3108.94لاکھ روپے کی دستیاب رقم میں سے 801.47لاکھ روپے خرچ کئے جاچکے ہیں جبکہ ایم جی نریگا کے تحت 2009.65لاکھ روپے میں سے 196.20لاکھ روپے اب تک خرچ کئے جاچکے ہیں۔میٹنگ میں بتایا گیا کہ تعمیرات عامہ سیکٹر کے تحت 11172.17 لاکھ روپے کی تخمینہ لاگت سے 39پلوں کا کام دردست لیا گیا ہے او راب تک ان پر مجموعی طور 4246.53 لاکھ روپے خرچ کئے جاچکے ہیں۔میٹنگ میں بتایا گیا کہ 2017-18کے دوران ضلع سیکٹر کے تحت 42کلومیٹر کے ہدف کے مقابلے میں 9.10کلومیٹر لمبی سڑکوں پرمیکڈم بچھایا گیا ہے۔میٹنگ سے خطاب کرتے ہوئے الطاف بخاری نے ضلع انتظامیہ کو اہداف کے حصول کے لئے تمام کوششیں بروئے کار لانے کی ہدایت دی تاکہ لوگ سرکا رکی سکیموں سے بھرپور استفادہ کرسکیں۔انہوںنے محکمہ خوراک کے ناظم کو ہائیگام گودام میں سڑے ہوئے اناج کو ٹھکانے لگانے کے لئے کئے گئے اقدامات کے بارے میں 7روز کے اندر رپورٹ پیش کرنے کی ہدایت دی۔ وزیر موصوف نے محکمہ تعمیرات عامہ کے حکام کو نارہ بل ۔ ٹنگمرگ ۔ گلمرگ سڑک پر جاری کام میں سرعت لانے کی ہدایت دی۔ محکمہ صحت کے ناظم کو بھی مختلف کاموں کے حوالے سے ہدایات جاری کی گئیں۔انہوںنے اپنے فرائض لگن اور تن دہی کے ساتھ انجام دینے کےلئے ضلع انتظامیہ کے افسران اور اہلکاروں کی ستائش کرتے ہوئے تمام اہداف کو وقت مقررہ کے اندر حاصل کرنے اور بورڈ میٹنگ میں لئے گئے فیصلہ جات پر من وعن عمل کرنے کی ہدایت دی۔ ضلع کے مختلف حلقوں کے عوامی نمائندوں نے اپنے اپنے حلقہ ہائے انتخاب کے لوگوں کو درپیش مسائل کے بارے میں میٹنگ کو آگاہ کیا۔ بورڈ چیئرمین نے ان مسائل کو ترجیحی بنیادوں پر حل کرنے کا یقین دلایا۔میٹنگ کے بعد ایک افطار پارٹی کا اہتمام بھی کیا گیا جس میں قصبے کی معروف شخصیات کے علاوہ تاجر برادری سے وابستہ افراد اور ذرائع ابلاغ کے نمائندوں نے بھی شرکت کی۔
الطاف بخاری نے بارہمولہ بورڈ میں لئے گئے فیصلوں پر عمل درآمد کا جائزہ لیا
