سرینگر/کشمیر میں انسانی حقوق کی پامالیوں کو ''سنگین'' قرار دیتے ہوئے حریت کانفرنس (ع) کے چیئر مین میر واعظ عمر فاروق نے جمعہ کو اقوام متحدہ پر زور دیا کہ وہ یہاں کی زمینی صورتحال جاننے اور اس کا نوٹس لینے کیلئے ایک اعلیٰ سطحی ٹیم روانہ کرے۔
تاریخی جامع مسجد میں نماز جمعہ سے قبل اپنے خطاب میں میر واعظ نے کہا''ہم نے پہلے ہی اقوام متحدہ کے ہیومن رائٹس کمیشن کی کشمیر سے متعلق رپورٹ کا خیر مقدم کیا ہے ،لیکن اس عالمی ادارے کو چاہئے کہ یہاں ایک اعلیٰ سطحی ٹیم بھیجے تاکہ موقع پر حالات کا مشاہدہ کرسکے۔''
میرواعظ کو اس سے قبل آج صبح خانہ نظر بندی سے رہا کیا گیا۔
انہوں نے سبھی مزاحمتی لیڈران و کارکنان کی گرفتاری کی مذمت کرتے ہوئے کہا کہ انسانی حقوق کے عالمی دن سے قبل ہی چھاپوں اور گرفتاریوں کا سلسلہ وسیع کیا گیا ہے یہاں تک کہ موم بتیاں جلاکر پر امن احتجاج کی اجازت بھی نہیں دی جارہی ہے۔
نماز کے فوراًبعد میرواعظ نے جامع مسجد کے باہر انسانی حقوق کی مبینہ خلاف ورزیوں کیخلاف احتجاج کی قیادت کی۔