یواین آئی
ہرارے /ابراہیم زدران (52)، عظمت اللہ عمرزئی (27 رنز اور تین وکٹیں) اور مجیب الرحمن (چار وکٹیں) کی شاندار کارکردگی کی بدولت افغانستان نے پہلے ٹی-20 میچ میں زمبابوے کو 53 رنز سے شکست دے کر تین میچوں کی سیریز میں 1-0 کی برتری حاصل کر لی۔181 رنز کے ہدف کا تعاقب کرنے اتری زمبابوے کی ٹیم عظمت اللہ عمرزئی اور مجیب الرحمن کی تباہ کن بولنگ کے سامنے 127 رنز پر آل آؤٹ ہو گئی اور افغانستان نے وائٹ بال سیریز میں کامیاب آغاز کیا۔ زمبابوے کی اننگز کا آغاز انتہائی مایوس کن رہا، جب مجیب نے صرف دوسرے اوور میں لگاتار گیندوں پر دو وکٹیں حاصل کر لیں، جن میں تجربہ کار برینڈن ٹیلر کی وکٹ بھی شامل تھی۔ اس کے بعد عمرزئی نے میزبان ٹیم کو سنبھلنے کا موقع نہیں دیا اور اگلے ہی اوور میں دو مزید وکٹیں لے کر زمبابوے کا اسکور 25 رنز پر چار وکٹ کر دیا۔ عمرزئی نے اپنے اگلے اسپیل میں اوپنر برائن بینیٹ (15 گیندوں پر 24 رنز) کو بھی آؤٹ کر کے اپنی تیسری وکٹ حاصل کی۔ نچلی صف میں بلے بازی کرتے ہوئے بریڈ ایوانز نے 24 رنز بنائے جبکہ ٹینوٹنڈا ماپوسا نے 15 گیندوں پر 32 رنز کی دلکش اننگز کھیلی۔ تاہم بعد میں مجیب الرحمن اور عبداللہ احمدزئی نے باقی کھلاڑیوں کو بھی جلد پویلین لوٹا دیا اور پوری ٹیم 16.1 اوور میں 127 رنز پر سمٹ گئی۔ افغانستان نے یہ میچ 53 رنز سے جیت لیا۔ عظمت اللہ عمرزئی کو ان کی آل راؤنڈ کارکردگی پر ‘پلیئر آف دی میچ’ قرار دیا گیا۔ اس سے قبل بدھ کی شب کھیلے گئے میچ میں افغانستان کی جانب سے سلامی بلے باز رحمان اللہ گرباز اور ابراہیم زدران نے شاندار آغاز فراہم کرتے ہوئے پہلی وکٹ کے لیے 76 رنز کی شراکت قائم کی۔ آٹھویں اوور میں گرباز 25 گیندوں پر 39 رنز بنا کر سکندر رضا کی گیند پر آؤٹ ہوئے ۔ اس کے بعد صادق اللہ (25) کو بلیسنگ مزرابانی نے پویلین بھیجا۔ بارہویں اوور میں سکندر رضا نے ابراہیم زدران اور درویش رسولی (صفر) کو لگاتار آؤٹ کر کے افغانستان کو مشکلات میں ڈال دیا۔ ابراہیم زدران نے 33 گیندوں پر چھ چوکے اور ایک چھکا لگا کر 52 رنز بنائے ۔ محمد نبی بغیر کوئی رن بنائے آؤٹ ہوئے جبکہ عظمت اللہ عمرزئی نے 21 گیندوں پر 27 رنز کی مفید اننگز کھیلی۔ آخر میں شہیداللہ نے 13 گیندوں پر ناٹ آؤٹ 22 رنز اور کپتان راشد خان نے پانچ گیندوں پر ناٹ آوٹ آٹھ رنز بنا کر ٹیم کا مجموعہ 20 اوورز میں چھ وکٹوں کے نقصان پر 180 تک پہنچا دیا۔زمبابوے کی جانب سے سکندر رضا نے تین اور بلیسنگ مزاربانی نے دو وکٹیں حاصل کیں۔ بریڈ ایونز نے ایک بلے باز کو آؤٹ کیا۔
